Монгол улсын боловсролын түүхэнд шинэ хуудас болж, анхны төрийн өмчит олон улсын хөтөлбөрийн сургалттай сургууль байгуулагдсанаас хэдийн арван жил болсон байна.

Шинэ эрин олон улсын сургууль нь дэлхийн жишиг болсон сургалтын хөтөлбөр, арга зүй, технологи, менежментийг өөрийн орны онцлогт нийцүүлэн, үндэсний цөм хөтөлбөртэй хослуулан амжилттай хэрэгжүүлдэг.

Тус сургууль анх 2010 оны арваннэгдүгээр сарын 22-ны өдөр 40 сурагч 13 багш, гурван удирдах ажилтантай хичээллэж эхэлжээ. Өдгөө олон улсын стандарт, шаардлагыг бүрэн хангасан барилга байгууламж, сургалтын техник хэрэгсэл, орчин нөхцөл бүхий сургууль болон хөгжсэн байна.

Нийт 240 төгсөгчийн 60 гаруй хувь нь АНУ, Англи, Австрали, Япон, БНХАУ, ХБНГУ, БНСУ, БНУУ, БНБУ, БНЧУ, БНЭУ, БНПУ, БНТУ, ОХУ, Канад, Тайвань, Сингапур, Итали зэрэг өндөр хөгжилтэй орнуудын шилдэг их дээд сургуулиудад, 40 орчим хувь нь МУИС, СЭЗИС, ШУТИС, АШУҮИС зэрэг Монгол Улсынхаа шилдэг их сургуулиудад амжилттай элсжээ.

Өнгөрсөн арван жилийн хугацаанд тус сургуулийн хамт олон, суралцагч, эцэг эхчүүд, гадаад дотоодын хамтран ажилладаг байгууллагуудын хамтын хүч хөдөлмөрөөр олон улсын жишигт хүрсэн сургалт, судалгааны төв бүхий загвар сургуулийн түвшинд хүрсэн юм.