Гашуунсухайт-Ганцмод боомтоор оны эхний 10 сарын байдлаар нийт 9.27 сая тонн нүүрс импортолсон гэж БНХАУ-ын талаас мэдээллээ. Энэ нь өмнөх оны мөн үеэс 104 хувиар буюу хоёр дахин өссөн дүн болжээ. Харин борлуулалт 14.2 сая тонн давж, дөрөв дахин нэмэгдсэн байна.

Боомтын нүүрсний импорт энэ оны гуравдугаар сараас хойш огцом нэмэгдсэн аж. БНХАУ-ын Засгийн газрын бодлогын дагуу дотоодын нүүрсний нийлүүлэлт буурсан нь импорт болон борлуулалтыг идэвхжүүлсэн байна. Харин наймдугаар сараас хойш боомтын нүүрсний импортын дундаж үнэ өсөж эхэлжээ.

Аравдугаар сарын байдлаар боомт дээр түүхий нүүрсний дундаж ханш тонн нь 730 юань байсан аж. Энэ нь өмнөх сараасаа 310 юаниар өссөн үзүүлэлт юм. Харин угаасан нүүрсний дундаж үнэ тонн нь 950 юань буюу өмнөх сараасаа 380 юаниар өссөн үзүүлэлт боллоо гэж БНХАУ-ын Өвөр Монголын Өөртөө Засах Орны Баяннуур хотын захиргаанаас мэдээллээ.

Б.Батманлай