Төрөөс ирэх онд баримтлах мөнгөний бодлогыг УИХ-ын чуулган нэгдсэн хуралдаанаар хэлэлцэж байна. Бодлогын баримт бичгийг боловсруулсан ажлын хэсгийг УИХ-ын гишүүн Ч.Ундрам  ахалжээ. Тэрээр “Төвбанк ипотекийн зээлийг олгох, энэ тогтолцоог үргэлжлүүлэх ёсгүй. 2023 оны төрөөс баримтлах үндсэн чиглэлд энэ асуудлыг тусган БХБЯ цаашид ипотекийн зээлийн тогтолцоог хариуцна хэмээн тусгасан.

Энэ дагуу Төв банк бэлтгэлээ хангасан  ч БХБЯ-нд  шаардлагатай хүний нөөц алга. Гэтэл ипотекийн зээлийн эрэлт маш их байна. БХБЯ-наас өгсөн судалгаанд нийлэлд 1 их наяд төгрөг, орон нутагт нийт 300 орчим  тэрбум төгрөгийн зээлийн эрэлт байна” гэв.

Ирэх онд Төв банк ипотекийн зээлийн тогтолцоог үргэлжлүүлэн хариуцах ч эх үүсвэр гаргахгүй гэж мөнгөний бодлогын үндсэн чиглэлд тусгажээ. Энэ нь зөв шийдвэр болсон, Монголбанк мөнгө хэвлэхгүй юм байна гэж УИХ-ын гишүүн Т.Доржханд хэлэв.

Ипотекийн зээлийн эргэн төлөлтөөр дараагийн зээлийг санхүүжүүлж байна. Ингэснээр жилд нийт 600-620 орчим тэрбум төгрөг эргэн төлөлтөөс цуглардаг аж. Энэ нь 4000 айлын л хэрэгцээ тул ипотекийн зээл авлигын эх үүсвэр болсон, энэ эх үүсвэр хүрэлцхгүй тул өөр ямар арга хэмжээ хэрэгжүүлэх талаар УИХ-ын гишүүн Ц.Туваан тодруулав. Тэрээр эрэлт бий тул Төвбанк мөнгө хэвлэж, энэ зээл олголтыг үргэлжлүүлэх ёстой, барилгын компаниудын нийлүүлэлтийг дэмжих ёстой гэв.  

Монголбанкны Ерөнхийлөгч Б.Лхагвасүрэн "Гурван долоо хоногийн өмнө Засгийн газар Хөгжлийн банкны 350 сая ам.доллларын бондыг төлсөн. Гэхдээ энэ нь гадаад валютын нөөцөд нөлөөлөөгүй. Гадаад валютын нөөц 4 тэрбум ам.долларт хүрсэн. Төгрөгийн ханш сүүлийн нэг жилд тогтвортой байна. Ирэх онд бид хэрэглээний зээлийн өсөлтийг бизнесийн зээл рүү шилжүүлэхэд анхаарна. Инфляц өндөр байгаа тул мөнгөний хатуу бодлого хэрэгжүүлэхээс өөр аргагүй" гэв.

УИХ-ын гишүүн Ч.Ундрам "Засгийн газар хот хөдөөгийн сэргэлт гэсэн бодлого явуулж буй тул ипотекийн зээлийг хөдөө илүү олгоно. 650 тэрбум төгрөг орон нутгийн зээлийн эрэлтийг хангана. Харин нийслэлийн эрэлтийг гүйцэхгүй. Энэ эрэлтийг хангахын тулд Төвбанк мөнгө хэвлэх хэрэгтэй. Ингэвэл инфляц улам өснө. Одоо 9 хувь байна. Инфляц өсвөл иргэдийн амьдралд сөрөг нөлөөтэй. Банкууд өөрсдийн эх үүсвэрээр ипотекийн зээл олгож байна" гэж хариуллаа.        

УИХ-ын чуулганы хуралдаанд 39 гишүүн оролцож байна.