АНУ-ын Мэйн мужийн Левистон хотод буугаар зэвсэглэсэн этгээд бусад руу гал нээж, дор хаяж 16 хүний аминд хүрсэн хэрэг гарчээ.

Хэрэг орон нутгийн цагаар лхагва гаргийн оройн зургаан цаг орчимд болсон бөгөөд гэмт этгээдийн үйлдлээс болж хохирсон иргэдийн тоо 50 давж байна.

Одоогоор цагдаагийн байгууллагаас амиа алдсан иргэдийн тоог тодорхой зарлаагүй ч 16-22 хүн хохирсон байж болзошгүйг урьдчилсан байдлаар тогтоожээ.

Тус хотын цагдаагийн байгууллагад хоёр байршилд буун дуу гарсан гэх дуудлага ирсэн байна. Тодруулбал хоорондоо 6.5 километрийн зайд орших хоолны газар болон боулингийн газарт буудуулсан гэх дуудлага бүртгэгдсэн.

Гэмт хэрэг үйлдсэн этгээдийг муж даяар эрэн сурвалжилж байна. Олон хүний аминд хүрсэн этгээд буюу 40 настай Роберт Кард өмнө нь АНУ-ын зэвсэгт хүчинд зэвсгийн сургагч багшаар ажиллаж байсан гэнэ.
Мөн түүнтэй холбоотой зарим мэдээлэлд түүнийг энэ оны зун сэтгэцийн эрүүл мэндийн төвд эмчлүүлж байх хугацаандаа ч бусдыг буудахаар сүрдүүлж байсныг дурджээ.
Хэрэв амь үрэгдсэн хүмүүсийн тоо 22 гэдэг нь батлагдвал 2019 оны наймдугаар сараас хойш тус улсад гарсан хамгийн их хохирогчтой гэмт хэрэг болох юм. 

Левистон хотод 38 мянга гаруй хүн оршин суудаг бөгөөд зэвсэглэсэн этгээдийг хайж буйтай холбогдуулан иргэдийг гэрээсээ гарахгүй байх, хаалга үүдээ сайн түгжихийг хотын захиргаанаас зөвлөж байгаа аж. 

Эх сурвалж: ВВС, Reuters