Данийн парламентын сонгуульд сөрөг  хүчний эвсэл ялалт байгуулснаар тус улс анх удаагаа эмэгтэй ерөнхий сайдтай болох нь. Социал демократ намын тэргүүн хатагтай Хелле Торнинг Шмитт татвар нэмэгдүүлэх тухай тийм ч таатай бус мөрийн хөтөлбөртэйгөөр сонгуулийн кампанит ажлаа явуулсан ч ялалт байгуулж чаджээ.

Одоогийн ерөнхий сайд Ларс Лёкке Расмуссен сонгуулийн үр дүнг хүлээн зөвшөөрч Социал демократ намын тэргүүнд утсаар баяр хүргэсэн байна.

Расмуссен тэргүүтэй Венстре либерал нам консерваторуудын хамт сүүлийн арван жилийн туршид Данийн засгийн эрхийг барьж байсан юм. Тэд гадаадынхны цагаачлал болон лалын шашинтнуудын аюул заналхийллийн эсрэг чухал асуудлуудыг хөндсөнөөрөө дарааллаж гурван удаа ялалт байгуулж байжээ.

Европын холбооны гишүүн Дани орон шенгений бүсэд ордог ч евро бүсийн гишүүн биш тул Расмуссений засгийн газар хамгийн сүүлд хилийн хяналтыг сайжруулах бодлого явуулсан байна.

Сонгуулийн кампанит ажлынхаа үеэр иргэдийн дунд хамгийн санаа зовоосон асуудал бол ажилгүйдэл болон тус улсын эдийн засаг байсныг Торнинг Шмитт онцолжээ. Расмуссений засгийн газрын үед Данийн эдийн засаг хамгийн хүнд үетэй нүүр тулж байв. Тус улсын банкууд хямралд өртөж, сүүлийн гурван жилийн хугацаанд есөн банкийг улс өмчилсөн байна.

Социал демократ намын тэргүүн ерөнхий сайд Ларс Расмуссеныг эдийн засгийн өсөлтийг тогтоон бариагүй хямралд хүргэсэн хэмээн буруутгажээ. Торнинг Шмитт сонгуульд татвараа нэмэгдүүлж, улсын зарлагыг нэмэгдүүлэх саналтайгаар өрсөлдсөн юм. Түүнчлэн даничуудад өдөрт 12 минутаар илүү ажиллах санал тавьжээ. Тэрбээр илүү цаг ажиллах нь эдийн засгийг тогтворжуулахад тустай гэж үзэж байна.

Шмитт Копенгагений Их Сургуулийг төгссөн бөгөөд 1993 онд Брюгг дэх Европын Коллежийн улстөр, төрийн удирдлагын чиглэлээр магистрийн зэрэг хамгаалсан байна.  Тус Коллежид суралцах үедээ тэрбээр Британийн лейборист Нил Киннокийн хүү, нөхөр Стивен Кинноктойгоо танилцсан байна.

А.Цацрал

Эх сурвалж: www.bbc.com