Жолооны курсуудын үнэ үндэслэлгүйгээр нэмэгдсэн гэх мэдээллийн дагуу Шудрага өрсөлдөөн хэрэглэгчийн төлөө газраас шалгалт явуулжээ.

Шалгалтаар жолооны курсууд В ангиллыг 180 мянга байсныг 280 мянга, В, С ангиллыг 360 мянгын төлбөртэй байсныг 460 мянгаас буулгахгүйгээр үгсэн хуйвалдаж тогтоожээ. Үүнд “Анх од”, “НЧО”, “СҮҮБ”, “Эрдэнэ-Уул”, “Батхүлэг” гэсэн таван жолооны курс орж байгаа юм.

Эдгээр аж ахуйн нэгжийг өрсөлдөөний тухай хуулинд заасны дагуу өмнөх жилийнх нь орлогын зургаа хүртэл хувьтай тэнцэх хэмжээний мөнгөн дүнгээр торгожээ. Өрсөлдөөний хуульд орсон шинэ заалтын дагуу үгсэн хуйвалдаж буйг мэдээлсэн аж ахуйн нэгжийг тухайн торгууль шийтгэлээс 100 хувь чөлөөлдөг. Яг энэ заалтын дагуу тухайн үгсэн хуйвалдагчдын дундаас мэдээлэл ирсний дагуу шалгалтыг зохион байгуулжээ. Тиймээс хуулинд заасанчлан мэдээлэл өгсөн аж ахуйн нэгжийг торгуулиас чөлөөлсөн бөгөөд тухайн мэдээлэгчийн нэр, хаягийг өгөх боломжгүй гэлээ.

Мөн цөөнгүй иргэд Шудрага өрсөлдөөн хэрэглэгчийн төлөө газрыг энэ талаарх мэдээллээр хангажээ. Харин энэ төрлийн мэдээлэл өгсөн иргэдийн хувьд тухайн аж ахуйн нэгжийг торгосон торгуулийн мөнгөн дүнгийн таван хувьтай тэнцэх хэмжээний урамшуулал олгохыг хуулинд заасан байдаг. Тиймээс тухайн иргэд мөн урамшууллаа авсан байна.

Харин үндэслэлгүйгээр нэмсэн төлбөрөөр сурсан иргэдийн хувьд асуудлыг хуулийн дагуу зохих байгууллагат нь хандан шийдвэрлүүлж болно гэлээ. Харин шудрага өрсөлдөөн хэрэглэгчийн төлөө газар бол зөрчлийг илрүүлэх болохоос түүнтэй холбоотой бусад арга хэмжээг авах эрхгүй байгууллага юм.

Хуулинд үгсэн хуйвалдаж, үндэслэлгүйгээр үнээ нэмсэнийг бусад аж ахуйн нэгжүүд дагаж нэмсэн бол мөн тэдэнд арга хэмжээ авахыг заасан байдаг. Тиймээс бусад жолооны курсуудэд ч зохих хариуцлагыг үүрүүлнэ гэлээ.

Иргэн танд үгсэн хуйвалдаж буй талаарх мэдээлэл байвал 1284 гэх утсанд мэдээлж болох юм.

Монгол Улсын хэмжээнд 300 гаруй жолооны курс ажилладаг бөгөөд үүний 132 нь нийслэлд байдаг ажээ.

М.Жаргал