Сүүлийн үед манай улсад сүлжээний бизнес газар авч байна. Үүнтэй холбогдуулан шууд худалдааны "DXN Монгол" ХХК-ийн дистрибьютрүүд сүлжээний маркетингийг ашиглан санхүүгийн пирамид үүсгэж иргэдийг луйвардаж байгааг анхааруулж хэвлэлийн бага хурал зарлав. Тэдний мэдээлж буйгаар иргэдийг луйвардаж буй сүлжээний бизнесийг зохицуулсан эрх зүй манай улсад дутмаг байгаагаас ард иргэд амархан өртөж, хохирдог байна.

Мөн энэ талын мэдээлэл хомс байгаагаас сүлжээний бизнес нийгмийн шинжтэй болж өргөжсөн гэлээ. Тухайн бизнес эрхлэгчид нь ажилгүйдэл, ядуурлыг ашиглан "Түргэн хугацаанд, амар хялбар аргаар мөнгө олох боломжтой" хэмээн нийтэд сурталчилдаг аж. Өнгөрөгч жилүүдэд банк бус санхүүгийн байгууллагууд олноор гарч иргэдийн мөнгийг луйвардаж байсан.

Харин үүний дараа санхүүгийн пирамид буюу сүлжээний бизнес эрхлэгч компаниуд иргэдийн мөнгийг луйвардаж эхэллээ. Иймэрхүү бизнес нь ихэнхдээ ОХУ-аас манай улсад орж ирдэг байна. Одоогоор олон улсад хүлээн зөвшөөрөгдсөн компаниудаас манайд “DXN”, "Oriflame", "Неrbalife", "NSP", "Тяньши" зэрэг нь дистрибьютрийн худалдааны зарчмаар үйл ажиллагаагаа явуулж байгаа гэв. Харин "Ретрансмент теам", "Бат боломж", “Amego global”, “Youneed”, "ТVI ехргеss", "Star work market", "Smart club" гэх мэт сүлжээ компани олон улсад хуулиар хориглосон арга хэрэгсэл ашиглаж үйл ажиллагаа явуулж байгаа аж.

Иймээс DXN Монгол компаниас санхүүгийн пирамидын эсрэг шууд худалдааны компаниуд нэгдэн хамтарч ажиллах, ард иргэд сүлжээний бизнесийн нэрийг барьсан эдгээр компанийн үйл ажиллагаанд татагдан элсэж орохгүй байхыг анхааруулан уриалж байна.

Э.Оюун-Эрдэнэ http://www.niigmiintoli.mn/