Нийслэлийн мэргэжлийн хяналтын газраас гадуур худалдаалагдаж байгаа хүүхдийн тоглоомонд шалгалт хийсэн байна. Шалгалтаар Хятад улсаас оруулж ирэн худалдаалж буй тоглоомноос химийн хорт бодис илэрсэн аж. Чухам ямар тоглоом чанарын шаардлага хангахгүй байгаа талаар Нийслэлийн мэргэжлийн хяналтын газрын эрүүл мэнд, боловсрол соёлын хэлтсийн дарга Г.Баярболдоос тодрууллаа.

-Хаагуур худалдаалж байсан тоглоомноос ямар хорт бодис илэрсэн юм бэ?
-Шалгалтаар "Наран туул" худалдааны төвөөс эхлээд хүүхдийн тоглоом худалдаалдаг газруудыг хамруулан шалгасан. Мөн зарим нэг цэцэрлэгээр ч орсон. Ер нь хүүхдийн тоглоомыг Хятад улсаас оруулж ирдэг. Тэдний заримаас хар тугалаг, цайр, формальд зэрэг хүүхдийн биед муугаар нөлөөлөх химийн бодис илэрсэн юм.

-Ямар төрлийн тоглоом хортой байсныг тодруулж өгөхгүй юу?
-Резинин, хуванцар тоглоомноос хар тугалаг, цайр илэрсэн. Тухайлбал хүүхдүүдийн тоглох дуртай баарби хүүхэлдэй, бага насны хүүхдийн хаздаг тоглоом, резинин амьтны дүрстэй тоглоом байна. Мөн Буриад улсад хийлгэсэн лабораторийн шинжилгээгээр хүүхдийн хуванцар хоолны хэрэгслээс формальд гэдэг химийн бодис илэрсэн юм.

-Хүүхдийн тоглоомыг гаднаас нь хараад аюулгүй гэдгийг нь яаж мэдэж болох вэ?
-Үйлдвэрийн тоглоомууд гадаах сав баглаан дээрээ тоглох насны ангиллыг заавал бичсэн байдаг. Мөн тод өнгийн тоглоомноос татгалзах нь зүйтэй. Ийм тоглоомууд илүү их будагтай байдаг.

-Цаашид энэ тал дээр ямар арга хэмжээ авах вэ?
Шаардлага хангахгүй байгаа тоглоомуудыг устгадаг. Гэвч дахиад л оруулаад ирдэг. Цаашид манайх хүүхдийн тоглоом шинжилдэг тусгай лаборатортой болохоор төлөвлөөд байна. Хятадаас орж ирсэн хортой тоглоомоор хүүхдийнхээ нүдийг хуурч, биеийг нь хордуулж байснаас үндэсний тоглоомоо ур удамдаа өвлүүлцгээе.

Л.Алтанхишиг