Төв аймгийн Угтаал цайдам суманд хүн амины хэрэг гарсан. 61 настай эрэгтэй Г-гийн аминд цагдаагийн алба хаагчид халдсан гэж хохирогчийн ар гэрийнхэн болон нутгийнхан нь мэдээлэл өгч буй юм.

Энэ хэргийн талаар ЦЕГ-ын Хэвлэл мэдээллийн төвийн дарга, цагдаагийн дэд хурандаа  Б.Баатархүү мэдээлэл хийлээ. Тэрбээр,  Хохирогчид өчигдөр гадны биеийн үзлэг хийсэн. Улаанбаатар хотод задлан шинжилгээ хийнэ. Задлан шинжилгээний дүгнэлт гарсны дараа үхлийн шалтгаан тодорхой болно.

2019 оны 9-р сарын 23-ны 19.40 цагт тус сумын эмнэлэгт хүн нас барсан гэх дуудлага мэдээлэл ирсэн. Үүний дараа ЦЕГ-ын Мөрдөн байцаах албаны Тусгай сүбьектийн үйлдсэн гэмт хэргийг мөрдөн шалгах хэлтсийн ахлах мөрдөгчөөр ахлуулсан, прокурор, шинжээч эмчийн оролцуулсан бүрэлдэхүүн хэргийн газарт очиж, үзлэг мөрдөн шалгах ажиллагааг хийсэн.

Энэ хэргийн талаар өчигдөр хоёр сувгаар мэдээлэл гарсан. Зөрүүтэй мэдээллүүд байна. энэ дээр хэн нэгнийг хамгаалах гэсэн зүйл огт байхгүй. Төв аймгийн Заамар сумын цагдаагийн газрын ахлах мөрдөгч, цагдаагийн алба хаагч ажил үүргээ гүйцэтгэж явсан. Хулгайн хэрэг сэрдэгдсэн 14 настай хүүхдээс тайлбар мэдүүлэг аваад, шалгалтаар явах хугацаанд тус сумын нутаг дэвсгэрт гар хөл нь цус болсон хүн хоолны газрын гадаа орилсон байдалтай харагдсан.

Цагдаагийн алба хаагч уг асуудлыг шалгахад иргэн Г согтууруулах ундаа хэрэглэсэн байдалтай тээврийн хэрэгсэл жолоодож явсан. Гар хөл нь цус болсон нь ажилчдынхаа хоолыг хийх үхэр гаргаад явж байсан юм байна. ингээд иргэн цагдаагийн алба хаагчийн хооронд маргаан үүссэн. Алба хаагчид согтуурлын зэрэг тогтоох гэж цагдаагийн газар руу авч явна гэсэн. Авч явах хугацаанд иргэний бие муудаж, эмнэлэгт хүргэж өгсөн гэх тайлбар мэдүүлэгтэй байна. Энэ хэргийг тал бүрээс нь нарийн шалгах болно. Хэн нэгнийг өмгөөлөх биш, хэргийн бодит үнэнийг тогтоох нь цагдаагийн байгууллагын үүрэг.

Хоёр цагдаа хохирогчийг эмнэлэгт хүргээд зугтсан гэх мэдээлэл байна.