Хэвлэл мэдээллийн төвд 2018 онд үйлдэгдсэн гэмт хэрэг, захиргааны зөрчлийн талаар цагдаагийн байгууллагаас мэдээлэл хийж байна.

Цагдаагийн байгууллага нь 2018 онд нийт 621.647 дуудлага, мэдээлэл хүлээн /хоногт 1700, цагт 70 орчим/ авч зохих ажиллагаа явуулсан байна. Эдгээрийн 33.7 хувь нь гэмт хэргийн шинжтэй, 46.5 хувь нь зөрчлийн шинжтэй дуудлага мэдээлэл байна.

УЛСЫН ХЭМЖЭЭНД НИЙТ ГЭМТ ХЭРГИЙН ГАРАЛТ 12.3 ХУВИАР ӨСЖЭЭ

Улсын хэмжээнд нийт 36.220 гэмт хэрэг бүртгэгдсэн нь өмнөх оны мөн үетэй харьцуулбал 3961 хэрэг буюу 12.3 хувиар, нийслэлийн хэмжээнд 3705 хэрэг буюу 15.9 хувиар орон нутгийн хэмжээнд 231 хэрэг буюу 2.2 хувиар тус тус нэмэгджээ.

Бүртгэгдсэн бүх гэмт хэргийн 28095 буюу 77.6 хувийг хөнгөн, 8125 буюу 22.4 хувийг хүнд ангиллын гэмт хэрэг эзэлж байна.

Гэмт хэргийн илрүүлэлт улсын хэмжээнд 36 хувь байгаа нь өмнөх оны мөн үеийнхээс Улсын хэмжээнд 0.3 нэгжээр өсжээ.

Монгол Улсад 2018 онд бүртгэгдсэн нийт гэмт хэргийн 62 хувийг Өмчлөх эрхийн эсрэг гэмт хэрэг, 25.2 хувийг Хүний эрүүл мэндийн халдашгүй байдлын эсрэг гэмт хэрэг эзэлж байна.

Эдгээр гэмт хэргүүд нийлээд нийт гэмт хэргийн 87 гаруй хувийг эзэлж байна. 

Өмчлөх эрхийн гэмт хэргийн:

• 54.8 хувь буюу нийт гэмт хэргийн 34 хувийг "Хулгайлах"
• 23.9 хувь буюу нийт гэмт хэргийн 14.8 хувийг "Залилах" эзэлж байна.

Харин хүний эрүүл мэндийн халдашгүй байдлын эсрэг гэмт хэргийн 89 буюу нийт гэмт хэргийн 22 хувийг “Бусдын биед хөнгөн гэмтэл санаатай учруулах” гэмт хэрэг эзэлж байна. 

Нийт гэмт хэргийн 32 хувь нь гэр орон сууцанд, 21 хувь нь гудамж талбайд үйлдэгджээ. Мөн 8 хувийг эмэгтэй хүн оролцож, 9 хувийг согтуугаар, 3 хувийг гэр бүлийн хүчирхийллийн улмаас, 4 хувийг бүлэглэн, 2 хувийг хүүхэд оролцож үйлдсэн байна.

16389 хүн гэмт хэрэгт холбогджээ

Гэмт хэрэг үйлдсэн нийт иргэдийн 41.5 хувь нь 18-29 насны залуучууд байна. Үүнээс 55.7 хувь нь эрхэлсэн ажилгүй, 15.7 хувь хувиараа хөдөлмөр эрхлэгч иргэд аж. Түүнчлэн гэмт хэрэг үйлдэгчдийн 13.5 хувийг эмэгтэйчүүд, 5.8 хувийг хүүхэд эзэлж байгаа юм.