Ашигт малтмалын орд газруудыг эдийн засгийн эргэлтэд оруулах, уул уурхайн салбарын бүтээгдэхүүнийг хямд өртгөөр тээвэрлэх дэд бүтцийг бий болгох шаардлага сүүлийн үед чухлаар тавигдаж байгаа билээ. Үүнтэй холбогдуулан төмөр замын “Ерөө” өртөөнөөс Сэлэнгэ аймгийн Ерөө сумын нутаг дэвсгэр дэх Баянголын төмрийн орд газар хүртэл 98 км төмөр замын суурь бүтэц барих тусгай зөвшөөрлийг “Болд төмөр Ерөө гол” ХХК-д олгох нь зүйтэй гэж үзэв.

Баянголын төмрийн орд газрыг ашиглах болон түүний суурь бүтэц барих, ашиглахтай холбогдсон гэрээ хэлэлцээрийг улс орны ашиг сонирхол, эдийн засагт сөрөг нөлөө үзүүлэхгүй байхуйцаар хийх асуудалд анхаарч, хяналт тавьж ажиллахыг ЗТАЖ-ын сайд Р.Раш-т даалгалаа.

Дөрвөн өртөөтэй уг төмөр замыг байгуулснаар төмөр замын чиглэлээр 180 гаруй, орд газрын олборлолт, баяжуулах үйлдвэрлэлийн салбарт 1200 гаруй байнгын ажлын байр бий болох юм. Түүнчлэн 98 км суурь бүтэцтэй төмөр замын объект бий болсноор тухайн бүс нутагт байгаа уул уурхайгаас “УБТЗ”-ын үндсэн гол замаар тээвэрлэх ачааны хэмжээ жилд дунджаар 3-5 сая тонноор нэмэгдэнэ гэж тооцож байна.

Засгийн газрын хэвлэл мэдээллийн албанаас мэдээлэв