БНСУ-ын тэргүүн хатагтай асан Ким Гён Хигийн докторын зэргийг албан ёсоор хүчингүй болголоо гэж Күүкмин их сургуулиас мэдэгдлээ.

Өнгөрсөн сард оюуны өмчийн хулгайн үндэслэлээр түүний магистрын зэргийг мөн хүчингүй болгоод байсан юм. Тэрбээр магистрын зэргээ 1999 онд Сүкмён эмэгтэйчүүдийн их сургуульд хамгаалжээ.

Үүний дараа Күүкмин их сургуулиас түүний докторын зэрэгт дахин үнэлгээ хийхээр болсон аж. 

Энэ талаар тус сургуулиас "Магистрын зэрэг цуцлагдсанаар Ким Гён Хи нь манай сургуульд докторын хөтөлбөрт элсэх шаардлагыг хангахгүй болсон тул докторын зэргийг нь цуцалсан" гэж тайлбарлажээ.

Цэргийн дэглэм тогтоосон шалтгаанаар огцорсон ерөнхийлөгч Юн Сок Ёлийн гэргий болох Ким Гён Хи нь 2008 онд Күүкмин их сургуульд докторын зэрэг хамгаалсан. 
Тэргүүн хатагтай асан өмнө нь бусдаас үнэтэй цүнх бэлгэнд авсан хэргээр олон нийтийн шүүмжлэлд ихээхэн өртөөд байсан нэгэн юм. 

Эх сурвалж: Yonhap