Багшийн их сургуулийн 100 жил, хөгжмийн багш бэлтгэж эхэлсний 60 жилийн ойг тохиолдуулан сурган хүмүүжүүлэгч, эстрадын дуучин Х.Галхүү агсны нэрэмжит хөгжмийн танхимыг нээв.

“Сургууль минь баяртай”, “Цэцгэн зүйрлэл”, “Мөрөөдлийн дуу” зэрэг бүтээлээр танигдсан дуучин, хөгжмийн багш Х.Галхүү хөгжмийн зохиолч С.Батболд, Т.Сэр-Од, Б.Бямбабаяр, дуучин Н.Гантулга зэрэг олон авьяастнуудыг урлагийн замд нь хөтөлжээ. Тэрбээр эстрадын урлагийн түүчээлэгчдийн нэг байснаас гадна, хөгжлийн боловсролын заах арга зүйн суурийг тавьж, боловсролын салбарт үнэтэй хувь нэмэр оруулсан байна.

Х.Галхүү агсны шавь нар сургуульдаа цуглан, багшдаа хүндэтгэл үзүүлэв. Монгол улсын урлагийн гавьяат зүтгэлтэн, Х.Галхүү агсны шавь Т.Цэцэрлэг уг үйл ажиллагааг санаачлан зохион байгуулжээ. Тэрээр “Хөгжмийн багш бэлтгэх салбар үүсэж хөгжсөний 60 жилийн ойг тохиолдуулан үе үеийн шавь нар нь нийлж багшдаа буян хийж, хойч үедээ үлдээх заах арга зүйн танхимтай боллоо. Энэ нь дараа дараагийн хөгжмийн багшаар суралцах оюутнуудын боловсролд хэрэгтэй” хэмээн тодотголоо.

Нээлтэд Х.Галхүү агсны шавь нар, Хөдөлмөрийн баатар, Ардын жүжигчин Д.Ухнаа, УИХ-ын гишүүн, 1991 оны төгсөгч Б.Баярсайхан, хөгжмийн зохиолч Н.Халиун зэрэг олон хүн оролцсон юм.