Эмэгтэйчүүдийн хүндийн өргөлтийн төрөлд манай баг түүхэн амжилт тогтоожээ

Бахрейны Манама хотод болсон хүндийн өргөлтийн Азийн аварга шалгаруулах тэмцээнд амжилттай оролцсон баг тамирчдад өнөөдөр шагнал гардуулав.

Нийт 27 улсын 397 тамирчин оролцсон хүндийн өргөлтийн Ази тивийн аварга шалгаруулах тэмцээнд олон улсын хэмжээний мастер Г.Анужин хоёр хүрэл медаль, Э.Энхтамир, О.Дархижав тус тус мөнгөн медаль, гавьяат тамирчин М.Анхцэцэг гурван алтан медаль тус тус хүртжээ.

Тэд эмэгтэйчүүдийн хүндийн өргөлтийн төрөлд багаараа медаль хүртсэн түүхэн амжилтыг тогтоож, гавьяат тамирчин М.Анхцэцэг 114 кг өргөж, улсын дээд амжилтыг шинэчилсэн юм.

Мөн гавьяат дасгалжуулагч Ц.Хосбаяр, мөнгөн медаль хүртсэн О.Дархижав нарыг “Биеийн тамирын тэргүүний ажилтан” цол, тэмдгээр шагналаа.

Олимп, нийтийн биеийн тамир, спортын сайд Б.Бат-Эрдэнэ “Засгийн газраас биеийн тамир, спортын салбарыг онцгойлон анхаарч эхэлсэн. 2023 оны улсын төсөвт спортын салбарын төсвийг 10 тэрбум төгрөгөөр нэмсэнд баяртай байна.” гэлээ.

Ц.Хосбаяр дасгалжуулагчтай баг сарын дараа болох Хүндийн өргөлтийн дэлхийн аварга шалгаруулах тэмцээнд оролцохоор, бэлтгэлээ базааж байгаа аж.