Нийгмийн даатгалын ерөнхий газраас ажилгүйдлийн тэтгэмжийн үйлчилгээний мэдээллийг хүргэв.

Ажилгүйдлийн даатгалын тэтгэмжийг ажилгүй болохоосоо өмнө 24 сараас доошгүй хугацаанд, үүнээс сүүлийн 9 сард нь тасралтгүй төлсөн ажилгүй болсон даатгуулагч авах эрхтэй. Харин урьд нь ажилгүйдлийн тэтгэмж авсан даатгуулагч ажилгүйдлийн даатгалын шимтгэлийг 12 сараас доошгүй хугацаагаар төлсөн нөхцөлд тэтгэмж авах эрх дахин үүснэ.

Тэтгэмж бодох хувь хэмжээ:

Даатгуулагчид ажилгүйдлийн тэтгэмжийг шимтгэл төлсөн сүүлийн 3 сарын дундаж хөдөлмөрийн хөлс, орлогоос дараах хувь хэмжээгээр бодож олгоно. Шимтгэл төлж ажилласан хугацаа 5 хүртэлх жил бол тэтгэмжийг 45 хувиар, 5-10 хүртэл жил бол 50 хувиар, 10-15 хүртэл жил бол 60 хувиар, 15 ба түүнээс дээш жил бол 70 хувиар бодно.

Ажилгүйдлийн тэтгэмж авахад бүрдүүлэх бичиг баримт:

• Хөдөлмөрийн байгууллагад бүртгүүлсэн тухай тодорхойлолт
• Ажлаас чөлөөлсөн тухай шийдвэр
• Тэтгэмж олгохыг хүссэн өргөдөл

Даатгуулагчид ажилгүйдлийн тэтгэмжийг нийгмийн даатгалын байгууллагад бүртгүүлсний дараагийн өдрөөс эхлэн ажлын 76 хоногийн хугацаанд олгоно.