Хөгжлийн банкны гүйцэтгэх захирал С.Мандуул 762 тэрбум төгрөгийн зээлийг улсын төсөв рүү шилжүүлэх саналаа нээлттэй сонсголын үеэр илэрхийлэв. Эдгээр нь тус банкнаас төрийн өмчит компаниудын авсан зээл юм. Харин УИХ-ын гишүүн Ч.Хүрэлбаатар энэ саналыг үгүйсгэн, “2016 онд сонгуулийн дараа Хөгжлийн банкны гурван их наяд төгрөгийн зээлийг улсын төсөв рүү шилжүүлсэн. Учир нь тэр үед цэцэрлэгийн санхүүжилт гэх мэт улсын төсвийн хийдэг ажлуудыг ч Хөгжлийн банк хийсэн байсан. Энэ ажилд С.Мандуул захирал Сангийн яаманд ажиллах хугацаандаа оролцсон байх.

762 тэрбум төгрөгийг улсын төсөв рүү шилжүүлэх тухай яриа байхгүй, энэ саналаа С.Мандуул захирал татаж аваарай. Өмнөх 3 их наядыг шалгавал дотроос нь их зүйл гарна. Улсын төсөв энд тэндхийн хогийг санхүүжүүлэхгүй, энэ бол татвар төлөгчдийн мөнгө шүү. Зээлийн барьцааг Дээд шүүхийн шийдвэрээр суллан, төр төрийг хохиролтой болгосон. Барьцаагүй зээлүүд чанаргүй болжээ. Төрийг хохироосон шүүгч нарыг яах вэ? Шүүхэд нөлөөлсөн гэж би хардаж байна. Би хардах эрхтэй. Х.Баттулга ерөнхийлөгч байх үед энэ үйл явдал болсон. 

Монголбанк 2015, 2018 онд шалгасан атлаа яагаад тухайн үед дуугараагүй вэ? Та нар хулгайч нартай хамтарсан юм уу? Төрийн байгууллагууд хэлэх юмаа цагт нь хэлж бай, адлуулахаас бүү ай. Одоо нэгэнт өнгөрсөн хойно дуугараад яах вэ. Х.Баттулгын "Шинэ Яармаг" төсөлд авсан мөнгийг иргэд төлөх юм уу? Гэв.          

Ерөнхий прокурор Б.Жаргалсайхан түүний асуултад хариулахдаа  “Ажлын хэсэг 50 гаруй хэрэг шалгаад 19 хэргийг сэргээсэн. Зээлийг зориулалтын дагуу зарцуулсан, зээлийн хүүгээ хугацаанд нь төлсөн зээлүүдийн хэргийг хаасан. Би тодорхой хэргийн нарийн мэдээллийг аваагүй байна. Эргэж мэдээлье. "Бэрэн" групп барьцаанд тавьсан үл хөдлөх хөрөнгө болох байр худалдаж байгааг Ц.Мөнхцэцэг гишүүн ярилаа. Үүнд анхаарна. Тодруулаад тухайлан танд танилцуулъя” гэв.

С.Мандуул захирал “Төрийн өмчит компаниудын найман зээл чанаргүй болсон. Газрын тос боловсруулах үйлдвэрийн ажилчдын хотхон, төрийн албан хаагчдын цалинг манай банкнаас санхүүжүүлжээ. Энэ нь төсвийн чанартай зардал тул улсын төсөвт шилжүүлэх санал гаргасан. "Эрдэнэс Монгол" компани зээл авч, Тавантолгой-Гашуунсухайт чиглэлд авто зам тавьсан. Тус компани зээлээ эргэн төлөх боломжгүй гэдэг. ТОСК-ийн зээл их ярвигтай. Манай банкны хадгаламжийг барьцаалан зээл авсан юм билээ. Бид шүүхэд хандсан ч манай эсрэг шийдвэр гарсан тул давж заалдана” гэв.       

ТӨРИЙН ӨМЧИТ КОМПАНИУДЫН АВСАН ЗЭЭЛ