НҮБ-ын дээд хэмжээний чуулга уулзалтаар шинэ Мянганы тунхаглал хэмээх баримт бичгийг 2000 онд баталсан билээ. Уг тунхаглал нь 2015 он хүртэлх хугацаанд шийдвэрлэвэл зохих арга хэмжээнүүдийг тусгасан байдаг. УИХ-аас НҮБ-ын зорилгыг 2005 онд дэмжин, ардчилсан засаглалыг бэхжүүлэх тухай зорилт нэмэн Монголд хэрэгжүүлэхээр болсон юм. Ингэснээр Монгол Улс өсөн зорилго, 22 зорилт, 24 шалгуур үзүүлэлт бүхий "Мянганы хөгжлийн зорилт"-той болжээ. Харин үүний хэрэгжилтийн талаар хоёр жил тутам УИХ-д тайлагнаж байхыг Засгийн газарт үүрэг болгосон байдаг. Энэ дагуу хаврын чуулган түр завсарлагааныхаа өмнө Мянганы хөгжлийн зорилтуудыг хэлэлцсэн юм. Энэ зорилтууд хэр амжилттай болсон талаар С.Оюун гишүүн өчигдөр хэвлэлийн бага хурал хийлгэв. Тэрбээр "Засгийн газраас өргөн барьсан тайланг УИХ-аар хэлэлцэж сайшаасан" гэлээ.

Гэхдээ Монгол Улсын Мянганы хөгжлийн зорилтуудын өнөөгийн хүрсэн түвшинг бүхэлд нь үнэлэхэд, хэрэгжилт ерөнхийдөө удаашралтай, хэрэгжүүлэх арга барил, бодлого, үр дүн нь уялдаа холбоо султай байгаа аж. Өөрөөр хэлбэл, УИХ-ын 2005 онд баталсан тогтоолын 24 шалгуур үзүүлэлтээс хүрэх түвшиндээ "Эрт хүрсэн" дөрөв, "Зорилтыг хангах боломжтой" гурав, "Хэрэгжилт удаан" долоо, "Өмнө хүрсэн түвшнээс ухарсан" 10 үзүүлэлт байгаа ажээ.

Ч.Нар