Монголын Урлагийн Зөвлөл (МУЗ) залуу уран бүтээлчдийг дэмжих, урлагийн сор болсон бүтээлийг олон нийтэд хүргэх, олон нийтийг урлагийн боловсролоор хангах зорилгын хүрээнд залуу кино найруулагч Ш.Ихбаярын анхны бүрэн хэмжээний уран бүтээл болох “Уран хас” баримтат киноны нээлтийг Алтан Хальс Холбоотой хамтран 2014 оны 11 сарын 22–нд 18:00 цагт, Тэнгис кино театрын 3-р танхимд хийх гэж байна.

“Уран хас” баримтат кино нь No Wonder Films-ийн бүтээл ба Алтан Хальс Холбооны дэмжлэгтэйгээр хийгдсэн юм. Арт хаус киног ард түмэндээ таниулан сурталчилж, түгээн дэлгэрүүлэхээр ажилладаг Алтан Хальс Холбооныхныг “Dreamers’ Day” өдөрлөг, artfilm.mn цахим хуудас, Алтан Хальс Олон Улсын Андерграунд Кино Наадмаар нь кино сонирхогчид сайн мэдэх билээ.

“Уран Хас” баримтат кино нь Монголын гурван залуу уран бүтээлч гэр бүлийн тухай өгүүлэх болно. Эдгээр нь;

1. Зураач Д.Дорждэрэм ба  Ж.Анунаран
2. Зураач Г.Гэрэлхүү ба Э.Энхзаяа
3. Зураач Н.Насанбат ба Д.Даваадулам

Гурван зураач гэр бүлийн хоёр гэргий нь уран бүтээлчид билээ. Ийнхүү таван зураачийн тодорхой нэг уран бүтээлээ туурвиж буй арга ажиллагаа, үйл явцыг харуулах юм. “Уран Хас” нь бодролын аясаар залуу бүтээлчдийн аж амьдрал, бүтээл туурвихуйг тольдох бөгөөд шинэлэг өнгө төрх, хүүрнэлт бус өгүүлэмжээрээ онцлог юм.

Ганц удаа үзэгчдэд хүрэх “Уран хас” киноны төгсгөлд найруулагч Ш.Ихбаяр болон кинонд оролцсон уран бүтээлчид үзэгчидтэй “Урлагтай яриа”-г бүтээлч баримтат кино хэрхэн яаж хийх, “Уран хас” хэрхэн бүтсэн талаар, мөн уран бүтээлч байх тухай чөлөөт ярилцлага өрнүүлэх болно.

МУЗ-ийн “Урлагтай яриа” нь уран бүтээлчдийг үзэгч, олон нийттэй уулзаж, чөлөөт ярилцлага хийх боломжийг олгодог бөгөөд өмнөх цуврал уулзалтаар дуучин Цахар Урнаа, Алтан Ураг хамтлаг, уран бүтээлч Д.Дорждэрэм нар уригдан оролцож байсан билээ.