Австрали-Улаанбаатар чиглэлийн онгоцоор өнгөрсөн шөнө 48 хүн ирсэн бөгөөд эдгээр хүмүүс нь Оюу толгойн гүний уурхайд ажиллах мэргэжилтнүүд юм. “Рио Тинто” компанийн захиалгаар МИАТ-ийн тусгай үүргийн онгоц Баруун Австралийн Перт хот руу нислэг үйлджээ.

Эдгээр хүмүүсийн сорьцыг цуглуулан шинжлэхээр ажиллаж байна хэмээн ХӨСҮТ-ийн ерөнхий захирал Д.Нямхүү хэллээ.

"МИАТ" ТӨХК-ийн онгоцоор тусгай үүргийн онгоц ийнхүү Австрали улс руу хоёр дахь удаагаа нислэг хийлээ.  Өмнө нь тус улс руу манай улсын иргэний агаарын тээврийн нислэг огт хийгдэж байгаагүй билээ. Анхны нислэгийг Оюу Толгой компанийн захиалгаар өнгөрсөн зургаадугаар сарын 5-нд хийсэн юм. Тодруулбал Оюу толгой компани Австрали улс руу ажилчдаа хүргэхээр “МИАТ” ТӨХК-ийн онгоцыг түрээслэн нислэг үйлдсэн юм.