"Зэрлэг байгалийн шилдэг гэрэл зурагчин 2020" тэмцээний үзэсгэлэнгийн эхний зургуудыг олон нийтэд дэлгэлээ. Аравдугаар сарын 16-нд Лондон хотын Үндэсний түүхийн музейд нээлтээ хийх тус үзэсгэлэнд шүүгчдээс хамгийн өндөр үнэлгээ авч өрсөлдсөн 68 зураг тавигдах ба эхний ээлжид зарим зургуудыг ил болгожээ.

Энэхүү тэмцээн нь хамгийн шилдэг байгалийн гэрэл зургуудыг үзэгчдэд хүргэдэг ба зурагчдаас фото сэтгүүлзүйн мэдлэг, ур чадвар шаарддаг. Тухайлбал "Douc" гэх нэн ховордсон бич, Амазоны ширэнгэн ой дахь аймшигт түймэр, мэлхийний өндөг идэж буй аалзны зургууд уралдаанд өрсөлдөж байна.

50 мянга орчим бүтээлээс шалгарах ялагчийг аравдугаар сарын 13-нд зарлах ба шагнал гардуулах ёслолыг Лондонгийн Үндэсний түүхийн музейгээс виртуалаар зохион байгуулах аж.

Тэмцээнд нийт 25 орны мэргэжлийн болон сонирхогчийн түвшний гэрэл зурагчид оролцож байгаа бөгөөд ялагчид нэмж 32 зураг оруулснаар нийт 100 зураг үзэсгэлэнд тавигдана.