- Сүүлийн үеийн дэвшилтэт техник технологи бүхий 360 гаруй тоног төхөөрөмж дагалдана -

АШУҮИС-ийн дэргэдэх Япон-Монголын Сургалтын эмнэлгийг бид ирэх сарын 1-нд хүлээж авна. Анх 2016 оны гуравдугаар сард эхлүүлсэн уг эмнэлгийн барилгын ажил дууссан бөгөөд өнөөдөр Улсын комисс шалгах юм. Япон улсын буцалтгүй тусламж, ЖАЙKA олон улсын байгууллагын төслийн хүрээнд баригдаж буй уг сургалтын эмнэлэг ашиглалтад орсноор АШУҮИС-ийн багш, оюутнууд сургалт хийхээс гадна амбулатори, хэвтэн эмчлүүлэх тасаг бүхий 104 орны хүчин чадалтайгаар үйл ажиллагаа явуулна. 

Мөн сүүлийн үеийн дэвшилтэт техник технологи бүхий 360 гаруй тоног төхөөрөмж түүн дотроо 1.5 тесла хүчин чадалтай MRI, CT, ангиограф (бүхий л судасны зураг авдаг) зэрэг Монголд байхгүй оношилгооны аппаратууд дагалдаж байгаа юм. 

Тус эмнэлэг ашиглалтад орсноор иргэдэд эмнэлгийн чанартай үйлчилгээг хүргэхээс гадна өндөр түвшний яаралтай тусламж үйлчилгээ, өнөөгийн Монгол улсад эмчлэгдэх боломжгүйд тооцогддог ихэвчлэн зүрх судас, мэдрэл, тархины өвчин эмгэг, хавдар гээд нийт 26 нэр төрлийн өвчнийг оношлох, эмчлэх боломжтой болно. Энэ нь Монголын анхны сургалтын эмнэлэг болж түүн дотроо эмнэлзүй, боловсрол, судалгаа гэсэн үндсэн гурван үүргийг гүйцэтгэнэ. 

ЭМНЭЛЗҮЙ нь ур чадвар болон чанарын өндөр түвшинд эмнэлгийн тусламж үйлчилгээг иргэдэд үзүүлэх 
БОЛОВСРОЛ нь анагаахын боловсрол олгодог болон эмнэлгийн ажилтнууд төгсөлтийн өмнөх болон дараах эмнэлзүйн судалгаа, шинжилгээг хийх
СУДАЛГАА нь эмнэлгийн тусламж үйлчилгээ болон иргэдийн эрүүл мэндийг дэмжих, сайжруулахад хувь нэмэр оруулахуйц судалгааны тухай юм. 

Японы улсын засгийн газар, ЖАЙKA олон улсын байгууллагын буцалтгүй тусламжийн санхүүжилтээр баригдаж буй уг эмнэлэг 7.9 тэрбум иенээр (80 сая ам.доллараар) бүтэж байгаа бөгөөд дагалдаж буй тоног төхөөрөмжтэйгөө нийлээд 13.6 тэрбум иен болж байгаа аж. Мөн манай улсаас нийт 2.7 тэрбум төгрөгийн зарим тавилга, төхөөрөмж хэрэгслийн зардлыг гаргажээ. Уг эмнэлэг  Баянзүрх дүүргийн 12-р хороо буюу Ботаникийн цэцэрлэгт хүрээлэнгийн зүүн хойно байрлана.

"ЯПОН УЛСЫН ЭМНЭЛГИЙН ҮЙЛЧИЛГЭЭТЭЙ ДҮЙЦЭХҮЙЦ БАЙЛГАХЫГ ЗОРИНО"

Дээрх барилгын үйл ажиллагаанаас гадна Япон-Монголын хамтарсан техникийн хамтын ажиллагааг хийх бөгөөд япон мэргэжилтнүүд 2022 он хүртэл тус эмнэлгийн эмч, ажилчдыг сургах, хүний нөөцийг чадавхижуулах, менежментийн сайжруулалт хийх юм.

Одоогийн байдлаар тус эмнэлэгт ажиллах манай улсын 80 гаруй эмч мэргэжилтнүүд Япон улсад сургалтад хамрагдаад байна. Ингэснээр өвчтөнд үзүүлэх үйлчилгээ, наад захын харилцаа гээд бүх агуулга, менежментийг Япон улсын эмнэлгийн үйлчилгээтэй төстэй байлгахыг зорьж байгааг албаныхан хэллээ. Япон-Монголын Сургалтын эмнэлэгт ойролцоогоор 400 гаруй багш эмч, ажилчид ажиллана гэлээ. 

Техникийн хамтын ажиллагааны үр дүнд "Сайн менежмент", "Өвчтөн төвтэй үйлчилгээ", "Эмнэлгийн дэвшилтэт үйлчилгээ", "Өндөр түвшний анхны тусламж" гэсэн үндсэн дөрвөн үр дүнг хүлээж байгаа гэдгийг япон мэргэжилтэн хэлж байлаа. 

Эх барих эмэгтэйчүүд, хүүхдийн тасаг гэх мэт нийт 104 ортой ч  энэ зургадугаар сард тус эмнэлэгтэй ойр байрладаг Уламжлалт анагаах ухааны сургуультай тунелээр холбож тэнд байрладаг 66 ортой нийлүүлбэл 170 орны хүчин чадалтай болно гэж АШУҮИС-ийн захирал Ж.Цолмон хэллээ. Мөн цаашид 300 хүн ч хэвтэн эмчлүүлэх боломжтой болно гэдгийг Япон талын албаныхан хэлж байлаа. 

Тус эмнэлэг наймдугаар сарын 1-ээс хэвтэн эмчлүүлэх өвчтөнүүдийг хүлээн авах бөгөөд тэр дундаа Баянзүрх дүүргийн тодорхой хороодын иргэдэд үйлчлэх ч цаашид улсын хэмжээнд төрөлжсөн нарийн мэргэжлийн 1042 нэр төрлийн тусламж үйлчилгээг иргэдэд үзүүлж, иргэд хуулийн дагуу эрүүл мэндийн даатгалаараа мөн төлбөрт үйлчилгээ авах боломжтой гэнэ.