Монгол Улсад орчин цагийн барилгын салбар үүсэж, хөгжсөний түүхт 93 жилийн ойн баяр энэ онд тохиож буй билээ. Тэгвэл тус баярт зориулсан “МОНГОЛЫН БАРИЛГАЧДЫН ӨДӨР" ёслолын арга хэмжээ есдүгээр сарын 6-нд Барилгачдын талбайд боллоо.

Арга хэмжээний үеэр Барилгын салбарын 2019 оны шилдэг 10 аж ахуйн нэгжийг шалгаруулан, Барилга, орон сууц, нийтийн аж ахуйн салбарт үйлчилгээ үзүүлж буй төрийн болон төрийн бус байгууллагуудын танилцуулга бүхий "НЭЭЛТТЭЙ ХААЛГАНЫ ӨДӨРЛӨГ" зохион байгуулагдав. 

Өдөрлөгт: 
-Барилга, хот байгуулалтын яам
-Газар зохион байгуулалт, геодези зурагзүйн газар
-Барилгын хөгжлийн төв
-“Төрийн орон сууцны корпорац” ТӨҮГ
-Орон сууц, нийтийн аж ахуйн удирдах газар
-Барилгын салбарын ТББ, мэргэжлийн холбоод, 
-Барилгын компаниуд оролцсон юм.

Мөн “Ногоон хөгжлийг хамтдаа бүтээе” уриан дор “Барилга орон сууц-2019” олон улсын үзэсгэлэн яармагийг есдүгээр сарын 06-наас 08-ны өдрүүдэд "Мишээл экспо" төвд зохион байгуулж байна. Үзэсгэлэнд үл хөдлөх хөрөнгийн төсөл хэрэгжүүлэгч, орон сууц борлуулагч, барилгын материалын худалдаа эрхлэгчид, дэвшилтэт техник, технологи нэвтрүүлэгч, барилгын компаниуд зэрэг гадаад, дотоодын 110 гаруй ААН, байгууллага оролцож, үйл ажиллагаагаа танилцуулж буй юм.

Барилгын салбараас Монгол Улсын дотоодын нийт бүтээгдэхүүнд оруулсан хувь хэмжээ 2019 оны хагас жилийн байдлаар 9.3 хувиар буюу 230.7 тэрбум төгрөгөөр өсөж, Улсын хэмжээнд хийгдсэн барилга угсралт, их засварын хэмжээ энэ оны эхний хагас жилийн урьдчилсан гүйцэтгэлээр 1.8 их наяд төгрөгт хүрч нэмэгджээ. 

Барилгын салбарын ажиллагсдын цалин 2016 онтой харьцуулахад 30.7 хувиар нэмэгдэж, энэ оны нэгдүгээр улирлын байдлаар 1 сая 123 мянган төгрөгт хүрч, жил бүр 8-9 мянга орчим суралцагч, инженер, техникийн ажилтан нэмэгдэж байгаа аж.

Эх сурвалж: Барилга, хот байгуулалтын яам