Эрүүл мэндийн яамны ээлжит хурлын үеэр ХӨСҮТ-ийн Тандалт, судалгааны албаны дарга А.Амбасэлмаа болон ЭМЯ-ны Шуурхай удирдлагын газрын дарга Д.Нарангэрэл нар сэтгүүлчдийн асуултад хариуллаа.

Тэд "Манай улсын уламжлалт анагаах ухаан дэлхийд гайхагддаг бөгөөд биеийн эсэргүүцэл сайжруулах дархлааг дэмжих сайн үр дүнтэй. Иймд уламжлалт анагаах ухааны эмчилгээний аргуудыг буюу аарц, чацаргана уух, цэгийн массаж хийх зэрэг аргыг зааж, зөвлөж байна. Монгол улс олон улсад хүлээн зөвшөөрөгдсөн эмчилгээний аргуудын хамт дархлаа дэмжих уламжлалт анагаахын аргыг хэрэглэж байна. 

Коронавируст халдварыг гарсан цагаас нь хойш хариу арга хэмжээг эрчимтэй авснаар өнөөдөр 100 гаруй тохиолдолтой байна. Монгол улс дахь тархалтын "attack rating"-ийг тооцож үзэхэд сайн гарч байна. Халдварын эсрэг хариу арга хэмжээг авч хэрэгжүүлснээр халдварын тархалтыг 55 хувь бууруулж байдаг гэж үздэг бол манай улсын хувьд энэ арга хэмжээгээ эрт авснаар 70-80 хувь бууруулсан. Өөрөөр хэлбэл хариу арга хэмжээ сайн авснаар халдварын тархалтыг 2-3 дахин бууруулсан. Одоогийн арга хэмжээг аваагүй бол халдвартай хүний тоо 800 гаруй байх байсан" гэв.