Нийслэл дэх Захиргааны хэргийн анхан шатны шүүхээс Сүхбаатарын талбайг Чингисийн талбай болгон өөрчилсөн Нийслэлийн иргэдийн төлөөлөгчдийн хурлын тэргүүлэгчдийн шийдвэрийг хууль бус гэж үзжээ.

Их жанжин Д.Сүхбаатарын гуч охин Д.Сүхжаргалмаагийн нэхэмжлэл бүхий хэргийг өчигдөр захиргааны хэргийн шүүхээр хянан хэлэлцээд ийнхүү шийдвэрлэсэн байна.

Д.Сүхбаатарын гуч охин болон түүний ураг төрлийнхөн “Сүхбаатарын талбай”-н нэрийг өөрчилснийг эсэргүүцэж байсан бөгөөд өнгөрсөн наймдугаар сард нэршлийг эргүүлэн өөрчлөх талаар иргэдийн гарын үсгийг цуглуулж байсан юм.

Харин Нийслэлийн Засаг даргын тамгын газрын хэвлэл мэдээллийн албанаас давж заалдана гэдгээ мэдээллээ.

НИТХ-ын тэргүүлэгчдийн хуралдаанаар 2013 оны долдугаар сарын 15-ны өдөр Сүхбаатарын талбайг Чингис хааны нэрэмжит болгохоор шийдсэн.

Эрдэмтэн, судлаачид болон 1111 төвд иргэдээс ирүүлсэн саналд үндэслэн дээрх асуудлыг хэлэлцсэн байна.