“Монгол улс дахь угсаатан судлалын шинжлэх ухаан: Өнгөрсөн, одоо, ирээдүй” олон улсын эрдэм шинжилгээний бага хурал болж байна. Хурал өглөө 09.00 цагт ШУА-ийн хүрээлэнгүүдийн байранд эхэлжээ.

Монгол улсад угсаатан судлалын шинжлэх ухааны анхны мэргэжилтэнг 1950-иад оны сүүл үеэс бэлтгэж эхэлсэн. 1961 онд ШУА-ийн Түүхийн хүрээлэн байгуулагдахад ууган салбаруудын нэг нь археологи-угсаатан зүйн салбар байв.

ШУА-ийн Ерөнхийлөгчийн 1985 оны  есдүгээр сарын 10-ны өдрийн тушаалаар Угсаатны зүйн сектор байгуулагджээ. Мэргэжлийн судлаач, эрдэмтдээс бүрдсэн судалгааны шинэ салбар үүсэн байгуулагдсан нь Монгол улсад угсаатан судлалын шинжлэх ухааны хөгжилд ач холбогдолтой үйл явдал юм.

Тиймээс ШУА-ийн Түүх, археологийн хүрээлэнгийн Угсаатан судлалын салбар бие даан байгуулагдсаны 30 жилийн ой, Монгол улсад угсаатан судлалын шинжлэх ухааны салбар үүсч хөгжсөний 60 гаруй жилийн судалгааны үр дүнг хэлэлцэхийн тулд олон улсын эрдэм шинжилгээний хурал зохион байгуулж байна.

Хурлаар Монгол улс дахь угсаатан судлалын шинжлэх ухааны үүсэл, хөгжил, монгол угсаатны угсаа гарвал, ахуй, соёл, орчин үеийн угсаатны нийгэм- соёлын судалгаа, түүний цаашдын чиг хандлагыг тодруулахыг зорьж байгаа  аж.