Өчигдөр Сонгинохайрхан дүүргийн замын цагдаагийнхан Сонгинохайрхан дүүргийн нутаг 22-н товчооны замд Портер маркын автомашинд хууль бус 104 тарваганы тулам, бичиг баримтгүй Тоз-8 маркын хоёр буу байсныг илрүүлжээ.

Тодруулбал, “Илрүүлэлт” нэгдсэн арга хэмжээний хүрээнд Сонгинохайрхан дүүргийн замын цагдаагийн тасгийн зохицуулагч цагдаа, цагдаагийн ахлах ахлагч Д.Батчулуун, Хамгаалалтын 1-р газрын цагдаа цагдаагийн ахлах ахлагч Б.Лувсан-Осор, Нийслэлийн мэргэжлийн хяналтын газрын мэргэжил хяналтын улсын байцаагч Д.Батбаатар, СХД-ийн цагдаагийн 1-р хэлтсийн хэв журмын ажилтан Ц.Цэнд-Аюуш, Н.Ганбаатар нар дээрх хэргийг илрүүлсэн байна.

Энэ жил тарваган тахлын хүний өвчлөлийн 9 тохиолдол бүртгэгдсэнээс, Ховд, Хөвсгөл аймгуудад хоёр хүн амиа алджээ.

Дээрх есөн тохиолдлын найз нөхөд, гэр бүлээрээ эмчилгээний зорилгоор, тарваганы эд эрхтнийг (элэг, ходоод, дэлүү, цөс, хүн мах гэх мэт) түүхийгээр залгиж, шүүрхий махыг хүнсэндээ хэрэглэсний улмаас халдвар авч өвчилж, амиа алдсан байна.

Иймээс ард иргэд ам дамжсан цуу ярианд итгэж өөрийгөө болон найз нөхдөө эмчлэх оролдлого хийж халдвар авах эрсдэл өндөр байгаа тул эмчилгээний зорилгоор тарваганы эд эрхтнийг түүхийгээр хэрэглэхгүй байхыг Зоонозын өвчин судлалын үндэсний төвөөс анхааруулж байна.

Урьдчилан сэргийлэлт:

1.Монгол Улсын хэмжээнд тарваган агнахыг хориглосон хуультайг АНХААР

2.Тарваган тахлын голомттой нутгаас хууль бусаар агнасан тарвага, тарваганы мах, арьс, түүхийн эд бүтээгдэхүүнийг хүн ам олноор суурьшсан хот суурин газар ХУДАЛДААЛАХ, ТЭЭВЭРЛЭХГҮЙ БАЙХ

3.Тарваганы хүн мах, элэг, цөс, ходоод, бөөр зэрэг ЭД ЭРХТЭНИЙГ эмчилгээний зорилгоор, хэрэглэхгүй байх

4.Сэжигтэй тарвага болон мэрэгч амьтан, тэдгээрийн зэм үхдэлтэй таарвал БҮҮ ХҮР.