Сангийн яам энэ сарын 19-нд  “Номад” “Сенчири-2” бондыг төлөх өрийн зохицуулалт хийв.

Тодруулбал, Засгийн газар 6.625 хувийн хүүтэй, таван жилийн хугацаатай 500 сая ам.долларын бондыг олон улсын санхүүгийн зах зээлд арилжааллаа. Энэ эх үүсвэрээр “Номад”, “Сенчири II” бондоос буцаан худалдан авч, өрийг зохицуулжээ.

500 сая ам.доллар нь өнөөдрийн Монголбанкны зарласан ханшаар нэг их наяд 731 тэрбум төгрөгтэй тэнцэнэ.

Хөрөнгө оруулагчдаас “Сенчири IV” бондыг худалдан авах анхдагч захиалга арилжаалах хэмжээнээс 8.2 дахин давж, 4.1 тэрбум ам.долларт хүрэв.

Энэ нь олон улсад Засгийн газрын бондын эрэлт өндөр байгаагаас гадна хөрөнгө оруулагчдын Монгол Улсад итгэх итгэл нэмэгдсэнийг харуулж байна.

Үүнтэй холбоотойгоор манай улсын бондын эрсдэлийн нэмэгдэл 2.27 хувь болж, түүхэн доод түвшинд хүрч буурсан. Бондын хүүг хоёрдогч зах зээлийн хүүгээс доогуур тогтоох боломжийг бий болголоо.

“Сенчири IV” бондыг арилжаалах үеэр манай улсаас өндөр зээлжих зэрэглэлтэй Узбекстан, Бразил, Доминикан бонд гаргасан ч манай улс эдгээр улсуудаас 0.1-0.4 нэгж хувиар бага хүүтэй бонд гаргалаа.

Ингэснээр дотоодын аж ахуйн нэгжүүд олон улсын санхүүгийн зах зээлээс хямд өртөгтэй санхүүгийн эх үүсвэр татах боломж нээгдэв.

Засгийн газраас гадаад өрийг ийнхүү зохицуулж, өрийн тогтвортой байдлыг сайжруулснаар 2026 оны "Номад" бондын үлдэгдэл төлбөрийг төсөв, эдийн засагт дарамтгүйгээр төлж, гадаад өрийн хэмжээг бууруулна.

Зээлжих зэрэглэл В2 тогтвортой байгааг дахин ахиулах, улмаар макро эдийн засгийн тогтвортой байдлыг хангахад чухал алхам боллоо гэж Сангийн яамнаас мэдээлэв.