МАН-ын Удирдах зөвлөл өнөөдөр /2025.06.17/ хуралдаж, Засгийн газрын бүтэц, бүрэлдэхүүний асуудлыг хэлэлцэж эхлэв. Удирдах зөвлөлийн 26 гишүүний 25 нь хуралдаа оролцож байна.

Ерөнхий сайд Г.Занданшатар зургаадугаар сарын 12-ны өдөр томилогдож, шинэ Засгийн газрын бүтэц, бүрэлдэхүүний тухай хуулийн төслийг УИХ-д яаралтай өргөн мэдүүлэхээ мэдэгдсэн. Гэвч өчигдөр Төрийн ордонд УИХ дахь МАН-ын бүлэг хуралдаагүйн дээр шинэ Засгийн газрын бүтэц, бүрэлдэхүүнтэй холбоотой шинэ мэдээгүй амралтын хоёр өдөр дамнасан ажлын гурав дахь өдөр үргэлжилж байна.

АН хүчтэй сөрөг хүчний байр сууринд Засгийн газрын гадна үлдсэн энэ үед Ерөнхий сайд бусад намтай хамтарч Засгийн газар байгуулахаа чуулганы танхимд илэрхийлсэн. Тэгэхээр ХҮН нам Засгийн газартаа үлдэж, Үндэсний эвсэл болон ИЗНН-д хамтрах урилга ирсэн нь тодорхой ч ямар хариу өгсөн нь хараахан тодроогүй байна.

Хэрэв АН-аас бусад нь хамтарвал МАН-ын 68, ХҮН намын 8, Үндэсний эвслийн 4, ИЗНН-ын 4 суудалтай нийт 84 суудал болж, эвслийн Засгийн газар байгуулагдвал Парламентад ч, Засгийн газарт ч бодлогын тэнцвэр хангагдах боломжийн хувилбар.

Л.Оюун-Эрдэнийн хамтарсан Засгийн газар 16 яам, 22 сайд, 38 агентлаг, 21 үндэсний хороотой буюу данхар бүтэцтэй, зардал өндөртэй байгааг АН-ын гишүүд шүүмжилж эхэллээ. Тиймээс шинэ Ерөнхий сайдад данхар бүтцээсээ татгалзаж яамдын тоогоо цөөлөхийг хэд хэдэн гишүүн сануулж байна.   

Ерөнхий сайд яам болон сайд нарын тоог цөөлөх талаар тодорхой байр суурь илэрхийлээгүй нь бусад намд хамтрах урилга хүргүүлэхдээ хүртээх бялууны хэрчмийг бодолцсоных биз ээ. 

Тухайлбал УИХ-ын гишүүн С.Эрдэнэболд, Шинэ Засгийн газарт 23 сайд, олон үндэсний хороо ажиллах шаардлагагүй. Хүнд зориулсан албан тушаал, түүнийг дагасан нүсэр том бүтэц, тэднийг тэжээх гэсэн үрэлгэн зардал гаргах хэрэггүй. Ерөнхий сайд өнөөгийн 23 сайдыг 14-15 болгох бүрэн боломжтой.  

Засгийн газраас Монгол Улсын 2026 оны төсвийн хүрээг өргөн мэдүүлж, УИХ-аар хэлэлцүүлэн батлуулсан. Төсвийн хүрээг хэлэлцэх үед төрийн албан хаагчийн тоог 10-15 хувь цомхтгох, ашиггүй ажиллаж буй төрийн өмчит компаниудаас хувьчлах зэргээр төрийн үрэлгэн зардлыг танах бодлогын шийдвэрүүд гарсан. Тиймээс шинэ Ерөнхий сайд төсвийн үрэлгэн зардлыг зайлшгүй бууруулах ёстой. Ингэж чадахгүй бол Г.Занданшатарын Засгийн газар удаан тогтож чадахгүй гэсэн юм.

Төсвийн үрэлгэн зардлыг танах гишүүдийн байр суурьтай эдийн засагч мэргэжилтэй шинэ Ерөнхий сайд санал нэгдэж байгаагаа тодорхой хэлсэн. Гадаад зах зээл дээр манай экспортын гол түүхий эдийн үнэ унаж, Улсын төсөв 2.4 их наядаар тасраад буй энэ үед шинэ Ерөнхий сайд юун түрүүнд 2025 оны Улсын төсөвт “хэмнэлтийн тодотгол” хийх замаар 2.3 их наяд төгрөгөөр танана гэдгээ мэдэгдсэн.

Харин Засгийн газрын бүтэц, бүрэлдэхүүнд өөрчлөлт оруулж, яам болон сайд нарын тоог цөөлөх талаар тодорхой байр суурь илэрхийлээгүй нь бусад намд хамтрах урилга хүргүүлэхдээ хүртээх бялууны хэрчмийг бодолцсоных биз ээ.