Өнөөдөр УИХ дахь МАН, АН-ын бүлгийн хуралдаанаар Хөгжлийн банкны тухай хуулийн шинэчилсэн найруулгын төслийг хэлэлцэв. Энэ үеэр УИХ-ын гишүүн Б.Бат-Эрдэнэ сэтгүүлчдэд байр сууриа илэрхийллээ.

Тэрээр уг хуулийн төсөлд Төлөөлөн удирдах зөвлөлийн (ТУЗ) эрх, үүргийг хязгаарласан заалтууд орж ирснийг шүүмжилж, “Санхүүжилтийн хэлбэрийг ТУЗ биш, гүйцэтгэх удирдлага дангаар шийдэх зохицуулалт нь эрсдэл дагуулна” хэмээн онцлов. ТУЗ-ийн бүрэлдэхүүнд есөн хүн байхаар заасан ч, тав нь төрийн төлөөлөл, дөрөв нь хараат бус гишүүн тул олонхоороо шийдвэр гаргана гэх заалт нь үнэн хэрэгтээ төрд бүх эрх мэдлийг төвлөрүүлж байгаа хэрэг.

Мөн санхүүгийн шийдвэрүүдийг ТУЗ гаргахаа болиод, нэг хүн гүйцэтгэх захирлын хэмжээнд шийдвэр гаргаад эхэлнэ гэдэг нь өөрөө том эрсдэл. Яг үнэндээ хөгжлийн банк дампуурсан биш хөгжлийн банкийг дампууруулсан. Хөгжлийн банк үйл ажиллагаагаа сайжруулахын тулд Эрдэнэс Монгол компанитай хамтын ажиллагааг өрнүүлэх төвшинд яригдаад явж байна. Одоо Эрдэнэс Монголыг дампууруулах юм уу? Эрдэнэс Монгол бол үндэсний баялгийн сан төвлөрч байгаа компани. Дампууруулсан Хөгжлийн банктай хамтын ажиллагааны хүрээнд оруулж ирээд цаашдаа Хөгжлийн банк нь Эрдэнэс Монголоо дампууруулж мэднэ. Өнөөдөр  хэлэлцүүлсэн Хөгжлийн банкны тухай хуулийн шинэчилсэн найруулга дээр засаглалын сайжруулалт харагдахгүй байна гэв.

Баялгийн сангийн 33 хувийг томоохон бүс, орон нутгийн хөгжлийн төсөл хөтөлбөрүүдэд зарцуулна гэх заалт бий. Хөгжлийн банк баялгийн сангийн зохицуулагч болох заалт хуулийн төсөлд орж ирсэн үү?

Тодорхой бус. Хөгжлийн банк мах гурилын бизнесийг дэмжих ёстой банк мөн үү, биш үү? Эсвэл мега төслүүдээ санхүүжүүлээд явах ёстой юм уу? Үүнийг зааглаж өгөх хэрэгтэй. Яг үнэндээ өнөөдөр Арилжааны банкнаасаа ялгагдахгүй байна. Энэ талд МАН-ын бүлгийн гишүүд шүүмжлэлтэй хандаж байна.  Бүтээмжийн менежерийг Засгийн газраас томилж байгаад ч бид шүүмжлэлтэй байна.

Хөгжлийн банкны активыг 1.5 их наядаар нэмэгдүүлсэн. Энэ санхүүжилтийг хаанаас, хэрхэн босгох асуудал шинэ хуулийн төсөлд  орж ирсэн үү?

Санхүүжилтын эх үүсвэр дандаа гаднаас өндөр хүүтэй босдог. Өндөр хүүтэй босож байгаа учраас өнөөдөр олгож байгаа зээл, хүүгийн хэмжээ хязгаарлагдмал өндөр хүүтэй, өртгөө нөхөж чадахгүй хэмжээнд хүрсэн. Гудамж төсөл гэхэд эргээд ямар ч ашиг, орлого бүрдүүлдэггүй төсөл. Бид цаашдаа ийм төслүүдийг санхүүжүүлэх ёстой юу гэдэг дээр нухацтай, шүүмжлэлтэй хандах хэрэгтэй гэв.