Монгол Улсад нисэх хүчин үүсэж хөгжсөний 100 жилийн ойг тохиолдуулан  Ерөнхийлөгч Ухнаагийн Хүрэлсүх зарлиг гаргаж, энэ салбарын шилдгүүдийг тодруулсан билээ. Хөдөлмөрийн баатар, гавьяат нисгэгч, нисэхийн гавьяат техникчид Ерөнхийлөгчөөс шагналаа гардсан.

Өнөөдөр ойн баярын хурал Корпорэйт зочид буудалд болж, Зам тээврийн хөгжлийн яамны удирдлагууд шагнал гардуулав.
         
Энэ Нислэгийн хөдөлгөөний үйлчилгээний албаны Аэдромын удирдлагын үйлчилгээний хэсгийн Ерөнхий нислэгийн удирдагч К.Энхбаяртай ярилцав.
   
-Би нислэгийн хөдөлгөөний удирдагч. 100 жилийн түүхт ойн баяраар шагнуулдсандаа маш их баяртай байна. 37 дахь жилдээ ажиллаж байна. Өнөөдөр Хөдөлмөрийн гавьяаны улаан тугийн одон хүртсэн нь манай хамт олны амжилт мөн.

Би 1988 онд их сургуулиа төгсөж ирсэн. Тухайн үед ЗХУ-ын стандартад суурилж байв. 1989 онд ИНЕГ олон улсын байгууллагад гишүүнээр элссэн. Үүнээс хойш бид олон улсын бүх дүрмийг хэрэгжүүлж ирлээ. Бидний хэрэглэж буй агаарын хөлгүүд, манай салбарт ажиллагсдын мэдлэг, ур чадвар бусад улсаас огт дутахгүй. Ази Номхон далайн орнууд дунд  Монгол Улс агаарын тээврийн аюулгүйн байдлын үзүүлэлтээрээ эхний тавд багтдаг. Ямар шинэ технологи нэвтэрнэ, тэр бүхнийг бид энд яг л адилхан хэрэглэж байна.   

Агаарын, усан, төмөр зам болон авто тээврийн төрлүүд бий. Эдгээрээс агаарын тээвэр хамгийн аюул багатайд тооцогддог.             

Нислэгийн удирдагчид 24 цаг ажилладаг. Хүмүүс унтаж байхад, баяр ёслол болж байхад бид ажиллаж л байдаг. Нислэгийн удирдагч их ховор мэргэжил тул удаан хугацаагаа сурах, дадлагажих шаардлагатай. Ажил дээр гараад онгоц удирдах хүртэл 4-5 жил шаардлагатай. Манай улсын агаарын зайд нэвтэрч, дамжин өнгөрч буй бүх онгоцны аюулгүй байдлыг хангах нь бидний үүрэг юм. Онгоцны дарга 300 зорчигчтой онгоцныхоо аюулгүй байдлыг хангадаг бол бид агаарт байгаа бүх онгоцны аюулгүй байдлыг хангадаг. Онгоцнууд хоорондоо мөргөлдөхөөс нь хамгаалдаг юм.
 
Мөн бид ажлаа англи хэлээр явуулдаг тул энэ хэлийг сайн сурсан байх шаардлагатай. 150 орчим агаарын тээврийн компанийн нисгэгчидтэй харилцдаг. Маш богино хугацаанд хүнд шийдвэр гаргах шаардлага ч гардаг. Иймээс залуу хүний хийдэг ажил. Би 12 жил онгоц  удирдсан. Сургалт, гадаад харилцаа гэх мэт өөр ажил хийлээ.               

Улс орныхоо нэр хүндийг авч явдаг ажил тул би мэргэжлээрээ, ажлаараа бахархдаг. Монгол далайд гарцгүй, өргөн уудам газар нутагтай. Иймд агаарын тээвэр амин чухал үүрэгтэй. Энэ тээвэр бидний цагийг хэмнэдэг. Залуус энэ мэргэжлийг сонгон суралцаасай гэж уриалмаар байна.                     

Гэрэл зургийг Т.Бархас