Асашёорюү Долгорсүрэнгийн Дагвадорж Японы Сумогийн холбооноос уулчлалт гуйсан тухай "Associated Press" агентлаг мэдээлэв. Сумогийн их аварга буяны зорилгоор зохион байгуулсан хөлбөмбөгийн тэмцээнд оролцсон юм. Өнгөрсөн наймдугаар сарын 1-ний өдөр Монголд болсон тоглолтын үеэр их аварга бэртэл авсан ажээ. Харин Японы сумогийн холбоо ийнхүү Монголд ирж тоглосныг нь буруутгаж, арваннэгдүгээр сарын сүүл хүртэл тэмцээнд орох эрхийг нь хассан билээ.

Асашёорюү Д.Дагвадорж үүнтэй холбогдуулан тайлбар хийхдээ "Монголын Засгийн газрын хүсэлтээр хөлбөмбөгийн тэмцээнд оролцсон" гэжээ. Уг нь тэрбээр хөлбөмбөгийн тэмцээний үеэр хүүхдүүдэд биеийн тамирын хувцас бэлэглэхээр төлөвлөсөн байна. Гэтэл дараа нь түүнийг оролцохыг ятгасан байна. Асашёорюүгийн ярьснаар тэмцээнд орохыг хориглосон явдал сэтгэл санаанд нь сөргөөр нөлөөлж, хяналтгүй болсон байна. Тэрбээр хэлэхдээ "Заримдаа хэнийг ч харахыг хүсэхгүй байсан" гэжээ. Их аварга өнгөрсөн наймдугаар сарын 29-нд эх орондоо ирж, шийтгэлийн хугацааг дуустал гэр бүлийнхэнтэйгээ цуг өнгөрүүлсэн. Өнгөрсөн арваннэгдүгээр сарын 30-ны өдөр тэрбээр Японд очсон даруйдаа хэвлэлийн бага хурал хийлгэж, Сумогийн холбоонд дахиж ийм алдаа хийхгүй гэдгээ амлав. Мөн сумогийн бүс нутгийн тэмцээнд өчигдрөөс эхлэн оролцохоор боллоо.