Ирж буй жилийн загварын өнгө төрхийг тодорхойлдог "Гоёл" наадам болоход хоёрхон долоо хоног үлдээд байна. 23 дахь удаагаа зохиогдох энэхүү наадам урьд жилүүдийн адил сонин содноор дүүрэн байх биз.

Хамгийн харгис гэгддэг энэ салбараас өдгөө гарын арван хуруунд багтахаар топ модель төрөөд байгаа. МДХ эхний жилүүддээ "Toп модель" бус "Шилдгийн шилдэг загвар өмсөгч" цолыг олгож байсан ба арваад жилийн өмнөөс топ хэмээн цоллодог болсон билээ.

Энэ арван топын нэг загвар өмсөгч Д.Пүрэвсүрэнтэй удахгүй болох гэж буй “Гоёл" наадмын хүрээнд ярилцлаа. Загварынхан түүнийг ямар ч хувцсанд хувирч чаддаг жинхэнэ жүжигчин модель гэж үнэлдэг. Өөрөө ч тэрээр СУИС-ийг жүжигчин мэргэжлээр дүүргэж, "Хувьсал" продакшнд харьяалагдан чамгүй олон бүтээлийн гол дүрийг бүтээн чадварлаг жүжигчин болохоо харуулсан билээ.

Түүнээс гадна телевизийн "Ододтой бүжиглэе" шоугаар сайн бүжигчин болохоо ч бас харуулаад амжсан. Мөн Монголд анх удаа контентийн эротик зураг авахуулах ажлын салхийг хагалан зоригтой алхам хийсэн түүнийг өөрийгөө биш хувцсаа харуулж, түүндээ хувирч чаддаг байх ёстой алтан зарчмыг хамгийн сайн баримталдаг топ гэж мэргэжлийнхэн үнэлдэг.

-Тун удахгүй "Гоёл" наадам болох гэж байна. Энэ наадмын талаар ямархуу сэтгэгдэлтэй явдаг вэ?
-Жил бүрийн "Гоёл" наадмыг загвар өмсөгчид болон дизайнерууд мөн үзэгчид тэсэн ядан хүлээдэг, хүлээлт бий болдог том наадам. Миний хувьд би өмнө нь ч хэлдэг байсан. Загвар өмсөгч болсны бахархал нь "Гоёл"-д орох байдаг гэж. Хүмүүс жил бүр л “Гоёл"-ын талаар тийм ийм болсон гэж ярьдаг. Гэхдээ энэ нь тухайн хүний л мэдэрсэн мэдрэмж, бодсон бодол шүү дээ. Магадгүй бид тайзны ард гүйлдэж байдаг болохоор тайзан дээрээс ямар харагдаж байгааг мэдэхгүй байж болох юм. Миний хувьд “Гоёл" жил бүр сайхан болдог. Энэ наадмыг хүлээдэг.

-Топуудын хувьд нэг дутагдал байх шиг санагддаг. Наадамдаа оролцдоггүй. Өнгөрсөн жил ч гэсэн өөрөөс чинь өөр топ "Гоёл"-д оролцоогүй санагдана?
-Ишиг эврээ ургахаар эхээ мөргөдгийн үлгэр зарим хүмүүст байдаг. Тэрийг би буруу гэж боддог. Анх бид алхаж ч чадахгүй амьтад дамжаанд ороод багш нараар заалгаж, дизайнеруудын хувцсыг өмсөж, сайн зурагчдаар зургаа авахуулж л олонд танигдсан. Тийм болохоор дизайнеруудын холбоо, дизайнерууд багш нартаа үргэлж баярлах ёстой. Хүн ганцаараа биш хамтран багаар ажиллаж байж л амжилтад хүрдэг. Дизайнеруудын холбоо гадаад харилцаандаа ихээр анхаарч аль болох олон орноос оролцогчид авчрахыг эрмэлздэг. Би бол дизайнеруудын холбооны бүтээгдэхүүн шүү дээ. Тиймдээ ч үргэлж хамтран ажиллаж энэ чиглэлээрээ ажлаа хийж өнөөдөр “Говь" компанийн face моделиор ажиллаж байна. Мөн “Гоёл" наадмын тайзны ар дахь зохион байгуулалт ч улам сайжирч байгаа.

-Энэ хугацаанд 10 гаруй топ төрж. Эднээс хэнийг нь илүү үнэлдэг вэ?
-Тэр энэ гэлгүй бүгдийг нь л хүндэлж явдаг. Бид нэг л салбарт ажиллаж, амьдарч байгаа учраас аль болох нэгнээ дэмжиж бас хүндэтгэж байх ёстой гэж боддог.