УИХ-ын Тамгын газрын Гадаад харилцааны хамтын ажиллагааны хэлтсийн зөвлөх асан Ц.Жаргалсайхан нь улсын нууц задруулсан, эх орноосоо урвасан хэмээн буруутгагдаж анхан шатны шүүхээс 17 жилийн чанга дэглэмтэй хорих ялаар шийтгүүлсэн.

Энэ хэргийг давж заалдах шатны шүүх хурал өнгөрсөн долоо хоногт болж, анхан шатны шүүхийн шийдвэрийг хэвээр үлдээгээд байгаа билээ.

Тус шийдвэрийн дараа Ц.Жаргалсайханы өмгөөлөгчид дараагийн шатны шүүхэд хандахаа мэдэгдсэн билээ. Энэ талаар Ц.Жаргалсайханы аав Д.Цахилгаанаас тодрууллаа.

-Ц.Жаргалсайханд холбогдох хэрэгт анхан шатны шүүхээс оногдуулсан ялыг давж заалдах шатны шүүхээс хэвээр үлдээсэн байна. Дараагийн шатны шүүхэд давж заалдах өргөдлөө өгнө гэсэн үү?
-Давж заалдаж л таарна даа. Өмгөөлөгч нартай нь ярилцаж байгаад Дээд шүүхэд өргөдлөө өгөх байх.

- Хүүгийн тань биеийн байдал гайгүй юу?
-Бие нь гайгүй гэсэн. Шүүх хурлын дараа өмгөөлөгч нар нь очиж уулзсан. Хямарсан амьтан л сууж байгаа байх даа хүү минь.