2025 оны 6 дугаар сарын 18-21-ны өдрүүдэд ОХУ-ын Санкт-Петербург хотноо ээлжит Санкт-Петербургийн эдийн засгийн чуулга уулзалт болох бөгөөд тус арга хэмжээний үеэр дэлхийн эдийн засгийн тулгамдсан асуудлуудыг хэлэлцэх болно. Монгол Улс энэхүү чуулга уулзалтын үеэр Шанхайн хамтын ажиллагааны байгууллага (ШХАБ) болон Евразийн эдийн засгийн холбоо (ЕАЭБ)-ын гишүүн орнуудтай яриа хэлэлцээ өрнүүлж, хамтын ажиллагаагаа өргөжүүлэх боломжтой билээ.

Монгол Улс 2004 онд ШХАБ-д ажиглагчийн статус авсан анхны улс болсон. ОХУ-ын ШУА-ийн Алс Дорнод судлалын хүрээлэнгийн орлогч захирал Андрей Островский хэлэхдээ, Монгол Улс ШХАБ-д элссэнээр Евразийн интеграцийн төслүүдэд оролцох боломж нь нэмэгдэнэ. “Тухайлбал үйлдвэрлэлийн шинэ сүлжээ бий болгож, худалдааны харилцаагаа бэхжүүлэх боломжтой” гэж тэмдэглэв.

Ази, Евразийн орнуудын хамтын ажиллагаа жилээс жилд өргөжин хөгжиж байна. Тухайлбал, 2024 онд ШХАБ-ын гишүүн орнуудын хоорондын худалдааны хэмжээ өмнөх оныхоос 12 хувиар нэмэгдэж, 6.4 их наяд ам.долларт хүрсэн нь тус байгууллагын бүс нутгийн эдийн засагт чухал ач холбогдолтойг харуулж байна.

Санкт-Петербургийн эдийн засгийн чуулга уулзалт нь энэхүү олон талт яриа хэлэлцээнд Монгол Улс оролцож өөрийн байр сууриа бэхжүүлэхэд тохиромжтой платформ болох боломжтой юм. 

Санкт-Петербургийн эдийн засгийн чуулга уулзалтын хүрээнд Монгол Улс ОХУ-тай ЕАЭБ-тай чөлөөт худалдааны түр хэлэлцээр байгуулах асуудлаар хэлэлцээ хийх боломжтой. Уг гэрээнд Монголын уламжлалт экспортын бүтээгдэхүүн болох нүүрс, зэсийн хүдэр, ямааны ноолуурын гаалийн татварыг бууруулах, тэглэх зэргийг оруулах боломжтой. Статистикийн мэдээллээр ЕАЭБ-ын орнууд руу Монгол Улсаас жил бүр ойролцоогоор 2.3 тэрбум ам.долларын бараа нийлүүлдэг.

ЕАЭБ-ын хүрээнд Монгол Улсын хүчин чармайлтыг “Нэг бүс, нэг зам” санаачилгатай уялдуулах нь онцгой ач холбогдолтой юм. Чөлөөт худалдааны түр хэлэлцээр байгуулсан эхний гурван жилд Монгол Улсын гадаад түншүүдтэй хийх худалдааны хэмжээг 15-20%-иар нэмэгдүүлэх боломжтойг Observer Research Foundation-ийн шинжээч Санжеев Кумар онцлов.

Монгол Улс ЕАЭБ-тай хамтын ажиллагаагаа хөгжүүлэх томоохон хэтийн төлөв харагдаж байна. Монгол Улс ЕАЭБ-ын гишүүн орнууд руу 367 нэр төрлийн бараа бүтээгдэхүүнийг татваргүй экспортлох бүрэн боломжтой болсон. Одоогоор талууд чөлөөт худалдааны түр гэрээнд гарын үсэг зураагүй байгаа. 

Монгол Улс Санкт-Петербургийн эдийн засгийн чуулга уулзалтын үеэр Орос, Хятад болон ШХАБ, ЕАЭБ-ын бусад гишүүн орнуудтай эдийн засгийн хамтын ажиллагаагаа өргөжүүлэх боломжтой төдийгүй тус чуулга уулзалтын оролцогчид харилцан хүндэтгэсэн, харилцан ашигтай, илүү шударга олон туйлт дэлхийн тогтолцоог бүрдүүлэх үйл явцад өөрсдийн хувь нэмрээ оруулах боломжтой юм.