Монгол Улсын 34 дэх Ерөнхий сайд Гомбожавын Занданшатар энэ сарын 13-нд Засгийн газрын тамгаа гардаж авсан. Үүнээс хойш дөрөв хоногийн дараа сайд нарын нэрс ил боллоо.

Ерөнхий сайд Г.Занданшатар "Мега төслүүдийг үргэлжлүүлэхийн тулд өмнөх засгийн 1/3-ийг хэвээр үлдээлээ. УИХ-д суудалтай намын төлөөллийг Засгийн газарт оруулах зарчим баримталлаа" гэв. Өмнөх Засгийн газраас ялгаатай нь хоёр биш гурван Шадар сайдтай болжээ. 

• Н.Учралыг Тэргүүн шадар сайд бөгөөд Эдийн засаг, хөгжлийн сайдад
• С.Амарсайханыг Шадар сайдад
• Т.Доржхандыг Шадар сайдад

Гэвч түүний Засгийн газарт ердөө хоёр эмэгтэй сайд ажиллах нь. 

• Б.Батцэцэгийг Гадаад харилцааны сайдад
• Ч.Ундрамыг Соёл, спорт, аялал жуулчлал, залуучуудын сайдад тус тус нэр дэвшлүүллээ. Одоо УИХ-ын гишүүд нэр дэвшигчдээс асуулт асууж байна.    

МАН-ын гишүүд шинэ Ерөнхий сайдад энэ сарын13-нд  шаардлага бүхий албан бичиг хүргүүлсэн.

Улс төрийн нам үл харгалзан Засгийн газрын томилгоо, бүрэлдэхүүнийг тогтоохдоо жендерийн квотыг баримтлах саналыг Ерөнхий сайдад хүргүүлсэн юм. 126 УИХ-ын гишүүнээс 51 нь гарын үсэг зуржээ. Тэдний 29 нь эрэгтэй, 22 нь эмэгтэй гишүүд байв.  

Олон улсад Засгийн газрын 40-60 хувь эмэгтэй гишүүн байх ёстой гэсэн тоо бий. Харамсалтай нь манай 2011 оны Жендерийн эрх, тэгш байдлыг хангах тухай хуульд, Засгийн газрын квот 15 хувь байна. Бид 15 хувьдаа ч хүрдэггүй байсан. Эмэгтэй сайдгүй ч Засгийн газар байж байсан. Хамгийн ихдээ л гурван эмэгтэй сайдтай байлаа. Хэрэв 23 сайдын 30 хувь гэвэл 5-6 эмэгтэй сайдтай байх боломжтой гэж УИХ-ын гишүүн Х.Баасанжаргал мэдэгдсэн.

Гэвч шинэ Ерөнхий сайд тэдний шаардлагыг хүлээн авсангүй. Эмэгтэй сайд нарын тоог буурууллаа.  Л.Оюун-Эрдэнийн Засгийн газрын эмэгтэй сайдууд нь С.Одонтуяа, Ч.Номин, Б.Батцэцэг нар байв.