УИХ дахь Хууль зүйн байнгын хорооны Хүний эрхийн дэд хорооны гишүүн Х.Баасанжаргал уралдаанч хүүхдийн эрх, эрүүл мэнд, аюулгүй байдалд онцгойлон анхаарч ажилладаг нэгэн билээ.

Тэрбээр Хүй долоон худагт уралдаанч хүүхдүүдийг гараанд гарахаас өмнө албаныхан хэрхэн хяналт тавьж, хувцас хэрэглэлийнх нь бүрэн бүтэн байдлыг шалгаж буйтай биечлэн танилцахаар ирсэн үед нь бид түүнээс зарим зүйлийг тодрууллаа.

Хүний эрхийн дэд хорооны гишүүн Х.Баасанжаргал "Өчигдөр хурдан морьдын уралдаанч хүүхдүүдийн талаар гарсан мэдээллийг үзээд санаа зовоод өнөөдөр энд хүрээд ирлээ. Тэдгээр хүүхдүүдийг хамгаалах үйл ажиллагаа бодит байдалд хэрхэн явагдаж буйг харахаар ирсэн. Бид жилийн жилд уралдаанч хүүхдийн эрхийг ярьдаг, тиймээс бодит байдалтай биечлэн танилцахыг хүссэн гэсэн үг. Тиймээс энэ бол шалгалт биш юм шүү.  Хэд хэдэн асуудлыг анхаармаар санагдлаа.

Нэгдүгээрт, хүүхдийн төрсний гэрчилгээнд зураг байдаггүй. Тиймээс тэр хүүхэд яг мөн үү гэдэг нь эргэлзээтэй. Хоёрдугаарт, цагдаа, хүүхэд хамгаалал, морины холбооноос энд ажиллаж байгаа ч хоорондоо мэдээллээ огт солилцдоггүй юм байна. Наад зах нь хүүхдийн номерын дугаараар шүүгээд тухайн хүүхэд хаанаас ирсэн, хэдэн настай гэх мэт мэдээллийг нь харах гэхээр тэр нь Хүүхэд, Гэр бүлийн төвд алга. Эргээд заавал морины комисст хандаж гар бичмэлээс шүүлгэж байж мэдээллийг нь харах шаардлагатай.

Гуравдугаарт, онцгойлон анхаарах ёстой нэг зүйл нь хүүхдийн эрүүл мэнд, бие, сэтгэлзүйн үзлэгийг огт хийдэггүй юм байна. Энд түргэний 103-ын эмч нар ажиллаж байна. Гэхдээ яг бэртэж гэмтсэн үед л эмнэлгийн тусламж үзүүлэхээс бус яг мордохоос өмнө эмчийн үзлэг хийдэггүй юм байна. Энэ бол маш их санаа зовоож буй асуудал байна.

Энэ тийм ч олон өдрийн ажил биш шүү дээ. Наадмын 2-3 өдөр л уралдаанч хүүхдэдээ анхаарах тогтолцоогоо эргэж харах хэрэгтэй юм байна. Мөн хувцасны стандартыг мөрдөж байна гэж байгаа боловч маш хуучирсан хувцастай байна. Түрийтэй гутал огт өмсдөггүй юм байна. Морьдынх нь сэрвээний өндөр хүрээгүй, хасагдсан уралдаанч хүүхдүүдтэй уулзаж ярилцахад "Түрийтэй гутал өмсөхөд төвөгтэй байдаг, зайдан унахаар сугараад байдаг" гэх мэт тайлбар хэлж байгаа ч бид хүүхдүүдээ хамгаалах ёстой. Хуульд хамгаална гэж заасан нь бодит байдалд хэрэгжихгүй байна" гэлээ.