"BSB сервис" компанийн нягтлан эмэгтэй их хэмжээний мөнгөтэй явж байгаад сураггүй алга боллоо гэх мэдээлэл сap шинийн баярын өмнөхөн цацагдаж байсан. Тус компанийн ажилтан Р.Мягмардолгор энэ оны хоёрдугаар сарын 13-ны өдөр ажлаа тараад, харих замдаа алга болжээ. Ар гэрийнхэн нь цагдаад хандснаар түүнийг эрэн сурвалжилж эхэлсэн юм. Хоёр cap шахам хэргийг шалгасны дүнд Р.Мягмардолгорыг хөнөөсөн байж болзошгүй хоёр хүнийг саатуулан шалгаж эхэлсэн байна.

Тэднийг Н.Мэндхүү, н.Болдбаатар гэдэг аж. Н.Мэндхүү өмнө нь "BSB сервис" компанид ажилладаг байжээ. Тэрбээр нягтлан эмэгтэйг харихаар явж байхад нь тааралдаж, хүргэж өгөхөөр машиндаа суулган авч явсан хэмээн мэдүүлсэн байна. Улмаар Төв аймгийн Жаргалант сумын нутагт аваачин хөнөөснөө ч хэлжээ. Хэрэг үйлдэхдээ ганцаараа бус найз н.Болдбаатартайгаа хамт байсан аж. Сэжигтнүүд хохирогч эмэгтэйн цогцсыг Жаргалант сумын нутагт булсан гэж мэдүүлснээр хэргийн газарт үзлэг хийж, өнгөрөгч баасан гаригт цогцсыг олжээ.

Нягтлан эмэгтэйг алга болсны дараахан тус компани санхүүгийн шалгалт хийсэн гэнэ. Шалгалтаар 40 орчим сая төгрөг дутсан болохыг тогтоосон. Талийгаач эмэгтэй алга болох үедээ их хэмжээний мөнгийг авч явсан уу эсвэл өмнө нь авсан байсан уу гэдэг нь тодорхойгүй байсан. Харин мөрдөн байцаалтын явцад хохирогч эмэгтэй нэлээд их хэмжээний мөнгөтэй явсан нь тогтоогджээ. Учир нь сэжигтнүүд мөнгийг үрж дуусгаснаа хүлээснээс гадна Н.Мэндхүү нь дээрх мөнгөнөөс хүүхдийн сургалтын төлбөрт тушаасан нь ч нотлогдоод байгаа аж.

Дашрамд дурьдахад, талийгаач Р.Мягмардолгор нь нөхөр, хоёр хүүхдийн хамт амьдардаг байжээ. Түүнийг алга болсонд нөхрийг нь сэжиглэж байсан ч ямар нэгэн холбогдолгүй болох нь тогтоогдсон байна.

А.Ням