“Халдварт бус өвчнөөс сэргийлэх, хянах чиг хандлага” үндэсний анхдугаар  чуулган өнөөдөр \2023.05.22\ боллоо.

ЭМЯ, НЭМҮТ, ДЭМБ хамтран зохион байгуулж буй үндэсний чуулганд хот, хөдөөгийн эрүүл мэндийн байгууллагын 150 гаруй төлөөлөл оролцож буй юм. Чуулганаар халдварт бус өвчнийг хянах болон хүн амыг урьдчилан сэргийлэх, эрт илрүүлэг, өвчний гаралтад нөлөөлж буй хүчин зүйлүүдийн талаар ярилцав.

ЭМЯ-ны НЭМГ-ын дарга Д.Баярболд “Монгол Улс Азид төдийгүй дэлхийд халдварт бус өвчний өвчлөлийн тохиолдол өндөртэй улс, орны тоонд орж байна. Эрсдэлд хүчин зүйл буюу архи, тамхины хэрэглээ, амьдралын буруу дадалтай иргэдийн эзлэх хувь 96 байна. Гэтэл нийт хүн амын ердөө 4 хувь нь л эрсдэлт зан үйлгүй гэдэг судалгаа гарчээ. Энэ нь халдварт бус өвчний гол шалтгаан болж байна. Буруу зан үйлийг өөрчлөхөд мэдлэг, хандлага чухал юм. Халдварт бус өвчний 50 хувь нь зан үйлээс шалтгаалдаг. Тиймээс урьдчилан сэргийлэх арга хэмжээг бодлогын түвшинд зөв хэрэгжүүлэх нь зүйтэй” гэв.

Өвөрхангай аймгийн ЭМГ-ын Нийгмийн эрүүл мэндийн хэлтсийн дарга М.Золзаяа “Өвөрхангай аймагт халдварт бус өвчний эрсдэлт хүчин зүйлийг тогтоох тархалтын үндэсний судалгаагаар 2013 онд тамхи татдаг хүн 19 хувьтай байсан бол 2019 оны судалгааны дүнгээр 24 хувь болж өссөн байна. Архины хэрэглээ ч мөн адил өсжээ. Тэгэхээр хүн амын дунд хорт зуршлын хэрэглээ, таргалалт, эрүүл бус хооллолт нэмэгдэж байгаа. Энэ нь халдварт бус өвчнөөр өвчлөх гол нөхцөл болж байна” гэлээ.