“Гантиг ордон” гэгддэг тансаг сууцыг барихад ашигласан чулуунуудад л гэхэд ойролцоогоор 80-100 сая дирхам зарцуулсан байна

750 сая дирхам буюу 204 сая ам.долларын үнэтэй, Версалийн ордныг санагдуулам тансаг харш өдгөө ид цойлж буй Дубайн тансаг зэрэглэлийн үл хөдлөх хөрөнгийн зах зээл дэх хамгийн өндөр үнэтэй орон сууцад тооцогдож байна.

Байршил сайтайд тооцогддог “Эмиратын толгод” хэмээх бүсэд байрладаг тус харш 5500 м.кв талбайтай, унтлагын таван өрөөтэй аж. 372 м.кв талбайтай гол унтлагын өрөө нь л гэхэд ердийн байшингаас ч том хэмжээтэй.

Доод давхартаа хооллох болон амралт чөлөөт цагаа өнгөрүүлэх өрөөнүүдтэй. Мөн 15 автомашины гаражтай, дотор болон гадна нь усан сан, шилэн бөмбөрцөг хэлбэртэй хоёр танхим, 70 мянган литр усны багтаамжтай аквариум, эрчим хүчний дэд станц, яаралтай тусламжийн өрөөнүүдтэй юм байна.

“Гантиг ордон” гэгддэг энэхүү тансаг сууцыг барихад ашигласан чулуунуудад л гэхэд ойролцоогоор 80-100 сая дирхам зарцуулжээ.

Түүнчлэн харшийг одоогийн эзэмшигчийнх нь 400 орчим урлагийн бүтээлийн хувийн цуглуулга чимж байгаагийн дийлэнх XIX-XX зуунд хамаарах уран баримал, уран зургууд байгаа аж. Харин худалдахдаа урлагийн бүтээлүүд болон тавилгуудыг багтаах эсэх дээр эзэмшигч нь тохиролцоо хийх юм байна.

Тухайн харшийг “Sotheby’s International Realty”-ийн үл хөдлөх хөрөнгийн охин компани "Luxhabitat" худалдаж байгаа аж.

Энэхүү харшийн барилгын ажил 12 орчим жил үргэлжилсний эцэст 2018 онд дуусаж байжээ.