БНХАУ Крымийн бүх нийтийн санал асуулгын дүнг хүлээн зөвшөөрөх эсэхээ шийдэж чадахгүй байна. Энэ талаар BBC мэдээлсэн юм.

Украин дахь нөхцөл байдал Хятад улсыг хэцүү байдалд оруулжээ.

Нэг талаас Хятад улс өөрийн удаан хугацааны холбоотон ОХУ-ын Украинтай холбоотой улс төрийн бодлогыг дэмжиж байгаа юм.

Харин нөгөө талаас ОХУ-ын бүрэлдэхүүн хэсэг болох гэсэн Крымийн оршин суугчдын хүслийг дэмжих нь Бээжингийн хувьд Тайван, Шинжаан, Төвд зэрэг өөрийн бүс нутгууд нь бие даасан байдлаа шаардах аюул нүүрлэх вий гэсэн айдсыг төрүүлээд байгаа юм.

Өмнө нь АНУ, Их Британи, Франц, Канад , Япон зэрэг улсууд Крымийн бүх нийтийн санал асуулгын үр дүнг хүлээн зөвшөөрөхгүй хэмээн мэдэгдсэн.

Крымийн автономит эрхийг өргөтгөх тухай бүх нийтийн санал асуулга өчигдөр болж өндөрлөсөн.

Одоогийн байдлаар 96.6 хувь нь тус улсыг Оростой нэгдэхийг дэмжсэн гэсэн дүн гарчээ.

Крымийн Автономит Бүгд Найрамдах Улсын ерөнхий сайд Сергей Аксенов “Крым Орос руу, гэртээ харина” гэж мэдэгджээ.