Бид хөрөнгө босгох болон хөрөнгө оруулагчдын тухай олон зүйлийг бичиж байсан. Хөрөнгө босгох хамгийн чухал зүйл нь бэлтгэлтэй байх бөгөөд, үүний тоонд зөв хөрөнгө оруулагч нарыг олох ч багтана.

Мэдээж хэрэг ихэнх гарааны бизнес эрхлэгчид хөрөнгө оруулж магадгүй хүмүүсийнхээ жагсаалтыг гаргачихсан, бусдаас сонсчихсон байдаг. Гэвч ихэнхдээ тэр жагсаалт нь буруу байх нь бий.

Жишээлбэл буруу замаар явж байгаа гарааны бизнес эрхлэгч надад ийм захидал бичнэ:

Гарчиг: Фрэд Уилсонтой танилцуулж өгөөч?

Сайн уу, Алекс

Бид одоо хөрөнгө оруулалт босгож байгаа болохоор чи Фрэд Уилсонтой танилцуулж өгч чадах уу?

Баярлалаа!

Жонн

Яг ийм захидалд миний хариулт хамгийн ойлгомжтой. Чадахгүй. Үнэхээр чадахгүй.

Зөвхөн Фрэд бид хоёрын харилцаанаас гадна, би зүгээр л гуйсан болгоныг танилцуулаад байж чадахгүй. Учир ямар ч шалтгаан байхгүй болохоор тэр юм. Захидал бичсэн залуу яагаад өөрийнх нь компани Фрэдэд тохирох тухай юу ч бичээгүй байна.

Тэгэхээр илүү дээр хувилбар:

Гарчиг: Фрэд Уилсонтой танилцуулж өгнө үү?

Сайн уу, Алекс

Фрэд сүлжээний бизнест хөрөнгө оруулах сонирхолтойг бид мэднэ. Бид Х-д зориулж шинэ сүлжээ бүтээж байгаа. Нээлтээ хийснээс хойш олон ч амжилтад хүрлээ, энэ асуудлаар Фрэдийн саналыг сонсмоор байна.

Чи үүнийг цааш нь дамжуулаад өгч чадах уу?

Баярлалаа,

Жонн

Энэ хувилбарыг харсан тохиолдолд би дамжуулах эсэх талаар бодож эхэлнэ. Хамгийн гол нь яагаад хөрөнгө оруулагчын сонирхлыг татах вэ, гэдэг асуултын хариулт юм. Жишээ нь:

• Энэ хөрөнгө оруулагч сонирхох зүйлийг бид хийж байна.
• Түүний сонирхдог загвараар ажлаа явуулдаг.
• Өмнө хөрөнгө оруулж байсан компаниудтай нь төстэй гэх мэт.

Тэгэхээр хөрөнгө оруулагч хайж байгаа тохиолдолд сайтар судалгаа хийх шаардлагатай. Хэрвээ судалгаа хийхгүйгээр, буруу асуулт асуувал хүмүүс таныг залхуу гэж үзээд шууд орхих магадлал өндөр.

Хөрөнгө оруулагч бүхэн өөр. Тиймээс тэдний анхаарлыг татаж, сонирхлыг төрүүлэх аргаа олох ёстой. Тэдний бичсэн номыг уншиж, өгсөн ярилцлагыг нь үзэж, хөрөнгө оруулсан компаниудынх нь жагсаалтыг олж ав.

Үүний дараа зөв хүнээ сонгосон гэдэгт итгэлтэй байгаа бол өөрийгөө хэн болохыг, юу хийж буйгаа танилцуулах л үлдэнэ.