Улсын онцгой комисс энэ сарын 6-нд хуралдаж, БНХАУ-ын хойд мужуудад хурдацтай тархаж буй, хүний метапнэвмовирусын талаар хэлэлцэв.

Гаднын хэвлэлүүд ч энэ вирусын талаар мэдээлж эхэллээ. Харин Бээжингээс энэ нь өвлийн саруудад хүүхэд, хөгшдийг түлхүү өвчлүүлдэг, нэг төрлийн ханиадны вирус хэмээн мэдэгдэв.

Энэ вирусын талаар иргэд нийгмийн сүлжээнд бичин, ковидын дараагийн давлагаа юу гэх мэтээр болгоомжилсон юм. Харин урд хөршийн эрх баригчид өнгөрсөн баасан гарагт “Санаа зовох шаардлагагүй, өмнөх өвөл ч энэ халдвар дэгдэж байсан” гэсэн юм.

HMPV вирус нь амьсгалын замын өвчин үүсгэдэг, халдвар авсан хүнд ханиадтай ижил шинж тэмдгүүд илэрнэ.Гэвч хүүхэд, ахмадууд, дархлаа сул иргэд хүндэрвэл мөгөөрсөн хоолойн үрэвсэл, хатгаа тусах аюултай.

Хамгийн анх энэ вирусыг 2001 онд Нидерландад бүртгэжээ. Энэ нь манай улсад сүүлийн саруудад зонхилж буй, синцитиаль вирустэй нэг омогт багтдаг.   

Технологийн шинэчлэлийн үр дүнд томуу, төст өвчин үүсгэгчдийг илүү хурдан илрүүлдэг болсон нь иргэдэд энэ төрлийн өвчлөл тархсан мэт буруу ойлголт, түгшүүр төрүүлсэн байж болзошгүй. Томуу, төст өвчний адил, өвчтөн сайн амарч, дархлаагаа дэмжсэнээр бүрэн эдгэрнэ.     

Гэхдээ энэ вирусын эсрэг вакциныг хөгжүүлж дуусаагүй, судалгааны түвшинд байна. Энэ вирус олон арван жилийн турш, өвөл болохоор иргэдийн дунд тархдаг тул дэлхийн хүн амын тодорхой хэсэгт дархлаа үүсжээ.

Харин Ковид-19 өмнө нь хүнийг өвчлүүлж байгаагүй, цоо шинэ вирус байсан. Үүгээрээ HMPV ихээхэн ялгаатай тул айж түгших шаардлагагүй, цар тахлын хэмжээнд тархахгүй гэж мэргэжилтнүүд зөвлөж байна. Гэхдээ вирус халдварласан тохиолдлууд, хүний эрүүл мэндэд үзүүлэх уршгийг үл тоомсорлож болохгүй.   

Өмнөх цар тахлаас авсан сургамжийн дагуу халдварыг аль болох хурдан бууруулах шаардлагатай юм байна.    

Эх сурвалж: The Guardian