"Эрүүдэн шүүлт тулгах, хүнлэг бус, хэрцгий хандахаас ангид байх хүний эрхийн хэрэгжилт"-ийн талаарх хяналтын сонсгол өнөө өглөө эхэллээ.

"УИХ-аас зохион байгуулж буй энэ сонсголийн ач холбогдол нь,

• Мэдээллийг сонсох, цуглуулах,
• Төрийн болон ТББ-ын мэдэх эрхийг хангаж, саналыг сонсож шийдвэр гаргах түвшинд нэгдсэн нэг ойлголттой болох,
• Төрийн байгууллага, албан тушаалтны үйл ажиллагаанд илэрсэн зөрчил, дутагдлыг арилгуулах асуудлаар Засгийн газар болон холбогдох бусад байгууллагад чиглэл, зөвлөмж өгөх асуудлыг хөндөх" хэмээн сонсгол даргалагч, УИХ-ын П.Сайнзориг танилцуулсан юм.

Хурлын эхэнд, эрүү шүүлт тулгах гэмт хэргийг манай улс хэрхэн шалгаж, шийдвэрлэдэг талаар ХЭҮК-ын дарга Д.Сүнжид танилцуулав.

Тэрбээр "УЕПГ, ЦЕГ, АТГ, ТЕГ-т эрүү шүүлт тулгах гэмт хэрэгтэй холбоотой гомдол мэдээллийг бүртгэж, мөрдөн шалгах ажиллагаа явуулдаг.

500 гомдол ирж байгаагийн 300 нь хэрэгсэхгүй болдог.

Дээрх агуулга бүхий 500 гомдол ирж байгаагийн 300 нь хэрэгсэхгүй болдог бол бусдыг нь шалгаж явсаар шүүхээр шийдвэрлэсэн нь жилд дунджаар хоёр л байна.

Баримтаас харвал,

2016-2023 оны хооронд эрүү шүүлт тулгах 14 гэмт хэргийг шүүхээр шийдвэрлэжээ. Өөрөөр хэлбэл, эрүү шүүлт тулгах гэмт хэргийн талаарх гомдол, мэдээлэлтэй харьцуулахад шийдвэрлэлт хангалтгүй байгаа юм" гэдгийг онцоллоо.

2023-2024 онд ХҮЭК-д нийт 108 гомдол мэдээлэл ирснийг танилцуулбал,

• Цагдаагийн байгууллагын алба хаагчтай холбоотой-55
• Прокурортой холбоотой-4
• Авлигатай тэмцэх газрын мөрдөгчтэй холбоотой-3
• Шүүгчтэй холбоотой-1
• Шүүхийн шийдвэр гүйцэтгэх газрын алба хаагчтай холбоотой-45

Хуульд заасан шалгах ажиллагаа явуулж, гэмт хэрэг, зөрчлийн шинжтэй байж болзошгүй 34 гомдлыг Авлигатай тэмцэх газарт, 3 гомдлыг Цагдаагийн ерөнхий газарт шилжүүлсэн.

Шийдвэрлэлт: АТГ,

• Хэрэг бүртгэлтийн хэрэг нээхээс татгалзсан-17
• Хэрэг бүртгэлийн хэрэг нээсэн-2
• Цагдаагийн байгууллагад шилжүүлсэн-5
• Прокурорын байгууллагад шилжүүлсэн-6

Цагдаагийн байгууллагад шилжүүлсэн гомдлын тухайд 2 гомдолд хэрэг бүртгэлтийн хэрэг нээхээс татгалзаж шийдвэрлэсэн байна.

Мөн хорих ангид ял эдэлж байгаа хүний тоо жил бүр 200-300-аар өсөж байгаа ба хоригдлуудын дунд судалгаа явуулахад 22.8 хувь нь халдашгүй байх эрхэд халдаж байна гэж хариулжээ.

ХЭҮК-т жилд ирдэг гомдлын 20-30 хувь нь шударгаар шүүлгүүлэх, хууль зүйн туслалцаа авах эрхийг хангахгүй байх, эрүү шүүлт, нэр төрийг гутаан доромжлохоос ангид байх эрхийг хангахгүй байна гэсэн утга агуулгатай байдаг аж.

СОНСГОЛЫГ ШУУД ДАМЖУУЛЖ БАЙНА: