Хөдөлмөрийн аюулгүй байдал, эрүүл мэндийн салбарт урьдчилан сэргийлэлт, даатгал, хяналт, эрхзүй зэрэг тогтолцооны шинэчлэлт хийх шаардлагатайг Гэр бүл, хөдөлмөр, нийгмийн хамгааллын сайд Л.Энх-Амгалан мэдэгджээ.

Тухайлбал, 2019-2023 онд улсын хэмжээнд хөдөлмөрлөх үүргээ биелүүлэх үедээ 240 хүн амь насаа алдаж, 823 хүн хүнд гэмтэж, 686 хүн хөнгөн гэмтэж, нийт 1748 үйлдвэрлэлийн осол, хурц хордлого бүртгэгдсэн байна.

Тэрбээр, Цаашид холбогдох хууль журам, даатгалын тогтолцоог шинэчлэхгүйгээр иргэдээ амь нас, эрүүл мэндээр нь хохироогоод орхидог байж болохгүй.

Хөгжингүй орнууд үйлдвэрлэлийн ослоос шалтгаалсан өвчний тусгайлсан Сэргээн засах тусламж үйлчилгээний эмнэлэг, Ослын даатгалын нийгэмлэгтэй байдаг.  

Даатгалдаа ч бүрэн хяналт тавьж, зөв чиглүүлж чадахгүй байна.

Манай улсын хувьд хувийн даатгалууд хөдөлмөрийн аюулгүй байдал, мэргэжлээс шалтгаалах өвчинд анхаарал хандуулдаггүй. 

Хөдөлмөрийн аюулгүй байдлын жишиг сургалтын төв, лаборатори байгуулж, энэ чиглэлээр мэргэжилтэн бэлтгэдэг их, дээд сургууль, мэргэжлийн холбоодоо дэмжиж, чиг үүргийг нь зөв тодорхойлох хэрэгцээ шаардлага байна.

Цаашдаа бид Эрүүл мэндийн яамтай хамтран Эрүүл мэндийн даатгалтай уялдуулж, бүх салбарт ослын дараа биш урьдчилан сэргийлэх, эрт илрүүлгийг сайжруулж, холбогдох хууль, журмаа бүрэн шинэчилж, шаардлагатай олон улсын конвенцид нэгдэнэ гэв.