Аймаг, нийслэл, сум, дүүргийн ИТХ-ын сонгууль 2024 оны аравдугаар сарын 11-нд болно. Үүнтэй холбогдуулан аймаг нийслэлийн сонгуулийн хороодын удирдлага, мэргэжилтнүүдэд зориулсан сургалт хоёр дахь өдрөө зохион байгуулагдаж байна.

Сургалтаар мэдээллийн технологийн багийн ахлагч, гишүүдэд Сонгуулийн мэдээллийн нэгдсэн сан цахим системийн ашиглалт, сан бүрдүүлэх, Сонгуулийн автоматжуулсан системийн тухай хууль, санал тоолох төхөөрөмжийн иж бүрдлийг ашиглах талаар мэдээлэл өгөв.

Аймаг нийслэлийн сонгуулийн хороодын удирдлага, мэргэжилтнүүдэд зөөврийн битүүмжилсэн саналын хайрцгаар санал авах, санал авах байр бэлтгэх, санал авах ажиллагааг зохион байгуулах, хяналтын тооллого хийх, баримт бичиг архивын нэгж хүлээлцэх хөрөнгө, орлогын мэдүүлэг гаргах, хөгжлийн бэрхшээлтэй иргэдээс санал авах зэрэг чиглэлээр сургалтууд оржээ.
 

Мэдээллийн технологийн багийн ахлагч, гишүүд сургалтын эхэнд хамтран ажилладаг үүрэн холбооны “Мобиком”, “Юнител”, “Жи Мобайл” болон “Ай Ти Зон”, “Интерактив” компаниудын үйл ажиллагаатай танилцсан юм.

Сонгуулийн мэдээллийн нэгдсэн сан (www.e-election.mn) цахим системийг ашиглах, мэдээллийн сан бүрдүүлэх талаар уг системийг хөгжүүлэгч “Интерактив” ХХК-ийн мэргэжилтнүүд мэдээлэл, сургалт хийлээ. Тодруулбал,  Сонгуулийн мэдээллийн нэгдсэн сан (www.e-election.mn)-гийн хэрэглэгчийн удирдлагаар хэсгийн хороодын эрх үүсгэх, шалгах, албан хаагч томилох, хүсэлт цуцлах, үнэмлэх хэвлэх болон хэрэглэгчийн дүр үүсгэх, тохируулах, эрхийн тохиргоо хийх талаар “Интерактив” компанийн Бүтээгдэхүүний менежер У.Наранханд, Э.Ундрал нар мэдээлэл өгч, дадлага хийлгэв.

Монголын тэргэнцэртэй иргэдийн үндэсний холбооны тэргүүн Б.Чулуундолгор сургалт орсон бөгөөд тэрбээр, Улсын хэмжээнд хөгжлийн бэрхшээлтэй 115 мянган иргэн байгаагаас 80 мянга гаруй нь сонгогчид.

Энэ нь нийт сонгогчдын 7 орчим хувийг эзэлж байна.  

Гэвч энэ хүмүүсийн сонгуулийн оролцоо бүрэн дүүрэн биш байгаа юм.

Учир нь хөгжлийн бэрхшээлтэй иргэдийн улс төрийн оролцоо буюу сонгуулийн талаарх мэдлэг бага, санал өгөх байруудын хүртээмжгүй байдал, ялгаварлан харьцах зэргээс хамаардаг.

Энэ жил манай холбооноос Баянзүрх дүүргийн санал авах 20 байранд үнэлгээ хийхэд 14 нь хоёрдугаар давхарт байрлалтай атлаа цахилгаан шатгүй. Дөрвөн  байр нь налуу замтай боловч нэг нь л шаардлага хангаж байсан. Иймээс хөгжлийн бэрхшээлтэй иргэдийн санал авах байрны хүртээмжид анхаарах хандуулах шаардлагатай байна.

Энэ асуудлыг холбогдох хүмүүст дуулгахад “Түр ашиглах байр учир тусгайлан тоноглох төсөв байхгүй” гэж үл тоодог. Эндээс харахад хөгжлийн бэрхшээлтэй иргэдийг сонгуульд оролцуулахад төсөв биш хандлага дутаж байна.

Хөгжлийн бэрхшээлтэй иргэдийг санал өгөхөд сайн дурынхныг ажиллуулахад их үр дүнтэй байсан. Саналын үр дүнд нь нөлөөлөхгүйгээр зааж ,чиглүүлж өгөх нь чухал юм” гэв.

Б.Энхням