Улаанбурхан өвчний нөхцөл байдлын талаар Халдвар Өвчин Судлалын Үндэсний Төв (ХӨСҮТ)-өөс өнөөдөр мэдээлэл өглөө.

ХӨСҮТ-ийн ерөнхий захирал Э.Анхбаяр "Хоёрдугаар сарын 18-наас хойш Улаанбурхан бүртгэгдсэнээр  Нийслэл, аймгийн эрүүл мэндийн газруудын дохиоллын удирдлагын тогтолцоо идэвхжин эрчимжиж тандалт хариу арга хэмжээг авч ажиллаж байна. Нийт 1756 тохиолдол бүртгэгдсэнээс 1199 нь эдгэрсэн. Улсын хэмжээнд нийт 11 аймагт улаанбурхны тохиолдол бүртгэгдээд байна. Нийт тохиолдлын 73 хувь нь нийслэлд, 27 хувь нь бусад аймагт бүртгэгдсэн. Өвчлөгсдийг насаар нь авч үзвэл 40 орчим хувийг 10-14 насныхан, 22 хувийг 0-4 насныхан эзэлж байна.

Хоёрдугаар сарын 8-наас хойш нийт 804 хүн хэвтэж эмчлэгдээд гарсан байна. Одоогоор 264 хүн хэвтэн эмчлүүлж буй. Тохиолдлын тоо ихсэх тусам хүндрэлийн тоо дагаад ихэсдэг. Өнгөрсөн долоо хоногт дархлаажуулалтын аян өрнүүлсэнтэй холбогдуулан вакцинд хамрагдсан иргэдийн тоо нэмэгдлээ.

Харамсалтай нь улаанбурханаар оношлогдсон дөрвөн сартай өвчтөн өнөөдөр эндлээ. Ар гэрийнхэнд нь гүн эмгэнэл илэрхийлье. Хүүхдийн биеийн байдал тун хүнд ирсэн. 2-3 эмнэлэг дамжсан, сар гаруй хатгалгаатай явсан байсан.

Улаанбурхны дэгдэлт ихэссэнтэй холбоотой дархлаажуулалтдаа хамрагдаагүй хүүхдүүд хүнд өвдөх эрсдэл өндөр байна. Мөн архаг хууч өвчтэй хүмүүст хүндрэл гарахыг үгүйсгэхгүй. Тиймээс дархлаажуулалтдаа идэвхтэй хамрагдахыг зөвлөж байна.

Тохиолдлын удирдлагын тогтолцоо ажиллан 7 хоног болгон хуралдаж, тандалт хариу арга хэмжээг авч явж буй. Улсын хэмжээнд тандалт хариу арга хэмжээний ажил 87 орчим хувьтай явж байна. Нийт 18 аймагт дэмжлэг хяналтаар очиж ажиллаж байна. 33 мянга гаруй тохиолдол дээр бол тандалт хавьтал судалгаа хийгдэж баталгаажуулалтын хариу арга хэмжээг хийсэн. Сүүлийн үед бол улаан бурхны тохиолдолд ихэссэнтэй холбоотойгоор ХӨСҮТ-ийн хүлээн авахад төвөөр үйлчлүүлэгчийн тоо эрс нэмэгдсэн. Өдөрт дунджаар 1200 орчим үйлчлүүлэгч ирж үзүүлдэг байсан бол одоо бол хоногтоо 1350 хүртэлх тооны үйлчлүүлэгч ирж буй үзүүлэлттэй байна" гэлээ.