Швейцарийн хөгжлийн агентлагийн санхүүжилтээр “Төрийн үйлчилгээг иргэдэд хүргэх нь” төслөөс Сүхбаатар дүүргийн 16 дугаар хороонд “Нэг цонхны үйлчилгээ”-ний төвийг нээв.

Засгийн газрын тогтоолын дагуу шинээр 4 хороонд нэг цэгийн үйлчилгээний төв байгуулах болсон. Үүний дагуу тус төвийг нээж байгаа бөгөөд Сүхбаатар дүүргийн 16 дугаар хороо нь 9600 орчим хүн амтай, дүүргийн төвөөс 10 гаруй километрийн зайд оршдог.

Тиймээс иргэд дүүрэг дээрээ ирж үйлчилгээ авахад хол байдаг бөгөөд дараалал ихтэй учраас цаг хугацаа алддаг байна. Харин “Нэг цонхны үйлчилгээ"-ний төвийг нээснээр энэ асуудал бүрэн шийдэгдэж байгаа юм. Иргэд нийгмийн халамж, нийгмийн даатгал, газрын харилцаа, иргэний бүртгэл зэрэг төрийн үйлчилгээг нэг дороос шуурхай авах боломжтой болж байгаа юм.

Мөн дүүргийн Нийгмийн даатгал, өмч, газрын албаны мэргэжилтнүүд баталсан цагийн хуваарийн дагуу ирж, иргэдэд үйлчлэх аж.

Ч.Ариунболд