Золбин нохдыг зөвхөн галт зэвсгээр бус өөр бусад аргыг хэрэглэн үржлийг нь багасгаж, тоог нь цөөлнө хэмээн мэдээллээ.

Хотын Ерөнхий менежер бөгөөд Захирагчийн ажлын албаны дарга М.Баяр:
- Гэрийн тэжээвэр амьтдын тухай хууль батлагдвал түүнийг дагасан журмууд бий болох учиртай. Нэг ийм хүлээлт бий. Түүнээс гадна бид золбин нохдыг уламжлалт аргаар буюу галт зэвсгээр устгадаг ба үүнийг шууд зогсоох боломжгүй. Нохой нь үржиж олон болохдоо маш хурдан амьтан учир энэ жилдээ буудлагын аргаараа тоог нь бууруулах арга хэмжээ авах болно.

Цагаан даваанд байрлах байгууламжийг өргөжүүлэн, тэнд нохдод тариа тарьж устгахаар судалж байна. Гарсан үр дүнд биш гарах эх үүсвэрт нь арга хэмжээ авах буюу эздийг нь хариуцлагажуулж спэй хийх, эзэмшиж байгаа нохдыг коджуулна.

Үрийн сувгийг хязгаарлах буюу спэй хийхэд олны шүүмжлэл дагуулж байсан ч энэ нь олон улсад хэрэгждэг арга.  Орхон аймгийн Баян-Өндөр сум үүнийг хэрэгжүүлээд золбин ноходгүй болсон туршлага бий. Зөвхөн галт зэвсгээр шийдэх асуудал биш өөр боломжит хувилбаруудыг туршиж, цаашид хэрэгжүүлэх болно. Зоонозын Өвчин Судлалын үндэсний төвөөс мэдээлснээр Улаанбаатарт 300-350 мянган золбин ноход бий гэсэн тооцоо бий.