"Эрдэнэс Монгол” ХХК ажлын байрны нөөцийн болон нээлттэй сонгон шалгаруулалтын талаар мэдээлж байна.

"Эрдэнэс Монгол" ХХК-ийн нээлттэй сонгон шалгаруулалтын эхний үе шатны “сорил-тест”-ийн шалгалтыг Төрийн албан зөвлөлөөр ахлуулсан ажлын хэсэг энэ сарын 26, 27-ны өдрүүдэд зохион байгууллаа.  

Хоёр дахь шатны шалгаруулалт болох эхний шатанд тэнцсэн оролцогчдын ярилцлагын шалгалт өчигдөр эхэлсэн.

Нээлттэй сонгон шалгаруулалтын ярилцлагын шалгалтыг зохион байгуулах дэд ажлын хэсгийг МҮХАҮТ ахлан явуулж байгаа.

Зохион байгуулагчдын зүгээс "Ярилцлагын шат өчигдөр 08:30 цагт эхэлсэн. Өчигдөр 123 хүн оролцохоос найман хүн ирээгүй, бусад нь амжилттай оролцсон. Өнөөдөр үдээс өмнөх ярилцлага дууссан. Нийт 78 хүн орохоос 74 хүн ирсэн. Дөрвөн хүн ярилцлагын шатанд оролцоогүй. Одоо үдээс хойших ярилцлагын шат үргэлжилж байна.

Сорилын шалгалтад 1215 хүн оролцсон. Үүнээс ярилцлагад 430-аад хүн хамрагдах юм. Энэ шалгалтыг гурван өдөрт зохион байгуулна гэж анх тооцоолсон боловч дөрвөн өдрийн турш ярилцлагыг авахаар болсон. Үүний дараа тав дахь өдөр ярилцлагын эцсийн дүнг нэгтгээд "Эрдэнэс Монгол" ХХК-д хүлээлгэн өгснөөр бидний сонгон шалгаруулалтын ажил дуусах юм.

Ажлын ярилцлагын шат ирц өндөртэй байна. Сорилын шалгалтад тэнцсэн залуус хариуцлагатай ирж байгаа. Ярилцлагын агуулгаар үндсэн чадамжийг шалгаж байна. Мөн "Эрдэнэс Монгол" ХХК-ийн тухайн ажлын байрны шалгуурыг харгалзаж байгаа. Нийт 71 албан тушаал, 88 ажлын байранд хүний нөөцийн сонгон шалгаруулалтыг зохион байгуулж байна.

"Эрдэнэс Монгол" ХХК-ийн удирдлагууд шалгалтад нэг л зүйлд оролцоотой байгаа. Тус компанийн төлөөлөл болох гүйцэтгэх захирал нь шалгалтын нэг багт өөрийн биеэр оролцоод ахлах менежерийн түвшний хүмүүстэй ярилцлага хийнэ.

Хамгийн өндөр оноо авсан гурван хүнийг компанийн удирдлагад санал болгоно. компанийн менежментийн багийг бүрдүүлэхэд зөвхөн анкет хараад тухайн хүний ур чадварыг хэлж мэдэхгүй учраас компанийн удирдлага нэг удаа уулзах зайлшгүй шаардлага байгаа гэж үзээд энэ хүнийг оролцуулсан. Бусад ажилд ямар нэг холбоо огт байхгүй. " гэж мэдээллээ.

МУИС-ийн Хуульзүйн сургуулийн багш Г.Давааням:

-Сорилго болон ярилцлагын шатанд хөндлөнгийн ажиглалт хийж байна. Бид шууд болон шууд бусаар хянаж байгаа. Шууд гэдэг нь ярилцлагыг сонсоод агуулгыг хянах, үнэлэлт, дүгнэлт өгөх боломжоор хангагдсан. Шууд бус гэдэг нь ярилцлагын танхимуудыг зайнаас төхөөрөмжөөр дамжуулан сонсох боломжтой. Хуваагдаж суугаад сонсоод явж байна.

Хоёр зүйл дээр нэлээн анхаарч байна уу гэж харлаа. Энэ шалгалтын зорилго нь шударгаар, нээлттэй, өргөн хүрээнд сонгон шалгаруулалт зохион байгуулаад хамгийн шилдэг боловсон хүчнийг шалгаруулж авах. Тийм учраас үндсэн ажлын хэсэгтэй адил энэ зорилгыг хэрэгжүүлэхийг дэмжих чиглэлээр ажиллаж байна.

Тулгасан асуулт тавих зэргээр дутагдал илэрвэл зөвлөмж бичээд эргээд яаж сайжруулах вэ гэдэгт дэмжлэг үзүүлж байгаа.