“GoGo-ийн асуултууд” булангийн Олон улсын эмэгтэйчүүдийн баярыг угтсан тусгай дугаарт “B продакшн”-ы артист NENE оролцлоо. Тоглолтын бэлтгэлээ хийгээд тун завгүй байгаа түүнийг бүжгээ бэлдэж байхад нь бид очив.

Өөрийнхөө байгаа байдал, хэв маяг, нандин мэдрэмжтэй хоолойгоороо үзэгч, сонсогчдынхоо сэтгэлийг татдаг тэрбээр анхны тоглолт болох өдрөө амьсгаа даран хүлээж, олон хүний итгэл, сэтгэлийг тоглолтоороо дамжуулж хөглөхөөр хичээж буй.

NENE анх аравдугаар ангид байхдаа дэлгүүрт сурталчилгааны ажил хийж, хэрэглээний мөнгөө олдог байснаа дурсав. Хүнийг хүн гэдгээр нь хүлээж авч, хэн бүхэнтэй хүндэтгэлтэй харьцахыг хичээх нь түүний нэрийн хуудас болсон зан чанар аж.

Хэрвээ хүн бүр ямар нэг ид шидтэй байсан бол NENE цаг хугацаагаар шилжихийг хүсдэг гэв. Өөрийгөө амьтантай зүйрлэвэл ирвэс байх байсан гэж хэлэн инээмсэглэх тэрбээр B пропакшнд харьяалагдаад жил гаруйн хугацаа өнгөрчээ.

Тоглолтынхоо үеэр дуунуудаа бичсэн түүхээсээ хуваалцаж, өөрийнхөө тухай “өөр” зүйлсийг үзэгч, сонсогч нартаа харуулахаар бэлдэж буй түүнд хамгийн их хань болдог зүйл бол муур нь.

Тэрбээр “Өөртөө өөдрөг, мундаг байгаарай гэж хэлдэггүй. Хүн болгонтой хүндэтгэлтэй харьцахыг хичээдэг. Урам зориг өгөх гэж өөртэйгөө ярьдаггүй. Муураа л эрхлүүлдэг дээ” гэсэн юм.

ХҮН ӨӨРТ НЬ БУСАД ХҮМҮҮС ХЭРЭГГҮЙ ЮМ ШИГ САНАГДДАГ Ч ЦААНАА ХҮЛЭЭЖ БАЙДАГ ЮМ БАЙНА ЛЭЭ

NENE яг одоо хамгийн их санаж байгаа хүндээ хандаж “Дээр уулзъя. Амжилттай байгаарай. Олон юм хийж бүтээгээрэй. Маш их санаж байгаа. Гэхдээ цаг нь болоогүй юм шиг байна лээ...”  гэсэн нь хөнгөн гуниг татуулав.

Мөн тэрбээр нэгэн сайхан дууг аялсан нь танд сэтгэлийн эм болохыг ч үгүйсгэхгүй. Бидний бичлэгээс түүний дуулж байгааг чих тавин сонсоорой.

Тодотгон хэлэхэд NENE сонсогчдодоо хандаж “Зөндөө их баярлалаа. Та нар байгаагүй бол би сэтгэл санааны хувьд энд байхгүй байсан. Хүн өөрт нь бусад хүмүүс хэрэггүй юм шиг санагддаг ч цаанаа хүлээж байдаг юм байна лээ. Энэ орон зайг миний сонсогчид, намайг дэмждэг хүмүүс нөхдөг. Та бүхэнд маш их баярладаг шүү” гэж дамжуулсныг хүргэе.

Ингээд түүнийг “GoGo-ийн асуултууд”-ад хэрхэн хариулсныг хүлээн авч үзэцгээе.

БИЧЛЭГ: